Maharashtra Weather Update : राज्यात मान्सूनला पुन्हा ब्रेक! 19 जुलैपर्यंत पावसाची उघडीप; बळीराजाची चिंता वाढली

जुलै महिन्याच्या सुरुवातीलाच दमदार हजेरी लावणाऱ्या मान्सूनने जून महिन्यातील पावसाची तूट काही प्रमाणात भरून काढली. त्यामुळे शेतकऱ्यांना मोठा दिलासा मिळाला होता. मात्र, आता राज्यात पुन्हा एकदा मान्सूनचा वेग मंदावला असून 19 जुलैपर्यंत पावसात मोठा खंड पडण्याची शक्यता हवामान तज्ज्ञांनी व्यक्त केली आहे.

हवामान विभागाच्या अंदाजानुसार, मुंबई आणि कोकण वगळता राज्यातील बहुतांश भागांत पुढील काही दिवस पावसाचे प्रमाण लक्षणीयरीत्या कमी राहणार आहे. त्यामुळे खरीप हंगामातील पिकांबाबत शेतकऱ्यांची चिंता वाढली आहे.

‘अल निनो’चा मान्सूनवर परिणाम

हवामान तज्ज्ञांच्या मते, प्रशांत महासागरात ‘अल निनो’ पुन्हा सक्रिय झाल्याने मान्सूनच्या हालचालींवर परिणाम झाला आहे. याशिवाय अरबी समुद्रातील कमी दाबाचा पट्टा कमकुवत झाल्यामुळे पावसाचे ढग विरळ झाले आहेत. परिणामी, 10 ते 15 जुलैदरम्यान राज्यातील अनेक भागांत पावसाचा जोर कमी राहण्याची शक्यता आहे.

19 जुलैपर्यंत पावसाची उघडीप

ज्येष्ठ हवामान अभ्यासकांच्या माहितीनुसार, मान्सूनचा पट्टा सध्या उत्तरेकडे सरकल्यामुळे मुंबई आणि कोकणात हलका ते मध्यम पाऊस सुरू राहील. मात्र, पश्चिम महाराष्ट्र, मराठवाडा, उत्तर महाराष्ट्र आणि विदर्भातील बहुतांश भागांत 19 जुलैपर्यंत उघडीप राहण्याचा अंदाज आहे.

खरीप पिकांसमोर संकट

जुलैच्या सुरुवातीला झालेल्या पावसामुळे अनेक शेतकऱ्यांनी खरीप पेरण्या पूर्ण केल्या आहेत. मात्र, आता सलग 10 ते 15 दिवस पाऊस न झाल्यास कोवळी पिके करपण्याची शक्यता आहे. त्यामुळे काही भागांत दुबार किंवा तिबार पेरणीचे संकट निर्माण होण्याची भीती व्यक्त केली जात आहे.

महिनाअखेरीस पुन्हा सक्रिय होणार मान्सून

सध्या पावसाचा जोर कमी झाला असला तरी जुलै महिन्याच्या अखेरीस मान्सून पुन्हा सक्रिय होण्याची शक्यता हवामान विभागाने व्यक्त केली आहे. तोपर्यंत शेतकऱ्यांनी पिकांचे योग्य व्यवस्थापन करावे आणि हवामान विभागाच्या सूचनांवर लक्ष ठेवावे, असे आवाहन करण्यात आले आहे.

Sangli Crime : प्रेमविवाहानंतर संसार उद्ध्वस्त; पत्नीने प्रियकराच्या मदतीने पतीचा गळा आवळून केला खून

Maharashtra Weather Update, Maharashtra Rain Update, Monsoon Break, El Nino Maharashtra, IMD Weather Forecast