Aurangabad Crime : गर्भपात आणि कामोत्तेजक औषधी बाळगणारा जेरबंद
औरंंंगाबाद : गर्भपाताच्या किट आणि कामोत्तेजक औषधी जवळ बाळगणार्‍या भारत जनार्दन सभादिंडे (वय ४५, रा.आनंदनगर, गारखेडा परिसर) याला अन्न व औषधी प्रशासन विभागाच्या पथकाने पोलिसांच्या मदतीने जेरबंद केले.
१९ नोव्हेंबर रोजी रात्री साडेआठ वाजेच्या सुमारास भारत सभादिंडे हा गर्भपाताच्या किट व कामोत्तेजक औषधी घेवून सिडको बसस्थानकातून दिपाली हॉटेल चौकाकडे जात होता. त्यावेळी अन्न व औषधी प्रशासन विभागाचे अन्न व औषध निरीक्षक राजगोपाल मुलचंद बजाज (वय ५१) यांनी आपल्या पथकाच्या मदतीने भारत सभादिंडे याला अडविले. त्याच्याजवळील पिशवीची झडती घेतली असता, त्यात गर्भपाताच्या किट व कामोत्तेजक औषधीचा साठा मिळून आला.
या प्रकरणी मुकुंदवाडी पोलिस ठाण्यात गुन्हा दाखल करण्यात आला असून पुढील तपास पोलिस निरीक्षक सुधाकर बावकर यांच्या मार्गदर्शनाखाली उपनिरीक्षक म्हस्के करीत आहेत.