सामाजिक न्याय योजनांचा लाभ तळागाळापर्यंत पोहोचवा – केंद्रीय राज्यमंत्री रामदास आठवले यांचे निर्देश
लातूर (अरुण जे. कांबळे) | केंद्र व राज्य शासनाच्या सामाजिक न्याय विभागामार्फत राबविण्यात येणाऱ्या सर्व योजनांची प्रभावी अंमलबजावणी करून त्यांचा लाभ गाव-खेड्यातील पात्र नागरिकांपर्यंत पोहोचवावा, अशा स्पष्ट सूचना केंद्रीय सामाजिक न्याय व सक्षमीकरण राज्यमंत्री Ramdas Athawale यांनी दिल्या.
लातूर येथील शासकीय विश्रामगृहात आयोजित आढावा बैठकीत ते बोलत होते. बैठकीस जिल्हाधिकारी Varsha Thakur-Ghuge, जिल्हा परिषदेचे मुख्य कार्यकारी अधिकारी Rahul Kumar Meena, पोलीस अधीक्षक Amol Tambe, महानगरपालिका आयुक्त श्रीमती मानसी, अतिरिक्त मुख्य कार्यकारी अधिकारी असलम तडवी, निवासी उपजिल्हाधिकारी केशव नेटके, उपविभागीय पोलीस अधिकारी समीरसिंह साळवे, समाज कल्याण सहायक आयुक्त यादवराव गायकवाड व जिल्हा समाज कल्याण अधिकारी संतोषकुमार नाईकवाडी यांची प्रमुख उपस्थिती होती.
युवकांसाठी करिअर मार्गदर्शन व स्वावलंबनावर भर
अनुसूचित जाती, अनुसूचित जमाती आणि नवबौद्ध घटकांतील युवक-युवतींना रोजगाराच्या संधी उपलब्ध करून देण्यासाठी करिअर मार्गदर्शन, कौशल्य विकास व उद्योग-व्यवसायासाठी प्रशिक्षण देण्याची गरज असल्याचे आठवले यांनी सांगितले. केंद्र व राज्य शासनाच्या विविध योजनांचा लाभ पात्र लाभार्थ्यांपर्यंत पोहोचवण्यासाठी विशेष मोहीम राबवावी, असेही त्यांनी नमूद केले.
‘सर्वांसाठी घरे’ उपक्रमाची प्रभावी अंमलबजावणी
जिल्ह्यात ‘सर्वांसाठी घरे’ उपक्रम प्रभावीपणे राबवून पात्र नागरिकांना कच्च्या घरांच्या जागी पक्की घरे उपलब्ध करून द्यावीत, असे निर्देश देण्यात आले. लातूर शहरातील विलासनगर व कॉईल नगर परिसरात गेल्या सुमारे ३० वर्षांपासून वास्तव्यास असलेल्या कुटुंबांसाठी विशेष प्रयत्न करण्याचे आदेश देत महानगरपालिकेला आराखडा तयार करण्यास सांगितले.
विविध योजनांचा आढावा
बैठकीत शासकीय वसतिगृहे, निवासी शाळा, शासन सेवेत अनुसूचित जाती प्रवर्गातील रिक्त पदे, आंतरजातीय विवाह प्रोत्साहन योजना, वृद्धापकाळ पेन्शन तसेच मुद्रा योजनेचा आढावा घेण्यात आला.
यावेळी जिल्हाधिकारी ठाकूर-घुगे, मुख्य कार्यकारी अधिकारी मीना, मनपा आयुक्त मानसी, समाज कल्याण सहायक आयुक्त गायकवाड व जिल्हा समाज कल्याण अधिकारी नाईकवाडी यांनी सामाजिक न्याय विभागाच्या योजनांच्या अंमलबजावणीबाबत सविस्तर माहिती सादर केली.
सामाजिक न्यायाच्या योजनांची प्रभावी अंमलबजावणी करून समाजातील शेवटच्या घटकापर्यंत लाभ पोहोचवण्याचा निर्धार बैठकीत व्यक्त करण्यात आला.