जामिनावर सुटताच थरारक हत्याकांड; POCSO आरोपीने पीडितेसह पत्नी-मुलांसह 6 जणांची हत्या
तेलंगणातील रंगारेड्डी जिल्ह्यात एक धक्कादायक घटना समोर आली आहे. पॉक्सो (POCSO) प्रकरणातील आरोपीने जामिनावर सुटल्यानंतर पीडित अल्पवयीन मुलगी, तिची आई आणि आजी यांची हत्या केली. त्यानंतर स्वतःच्या पत्नी आणि दोन चिमुकल्या मुलांचाही खून करत एकूण सहा जणांची निर्घृण हत्या केली. या घटनेनंतर आरोपी फरार असून पोलिस त्याचा कसून शोध घेत आहेत.
पोलिसांच्या माहितीनुसार, राजू कुमार (वय 35) याच्याविरुद्ध मे महिन्यात 16 वर्षीय मुलीचा पाठलाग आणि पॉक्सो कायद्यांतर्गत गुन्हा दाखल करण्यात आला होता. अटकपूर्व जामीन मिळाल्यानंतर तो काही दिवसांपूर्वी वैयक्तिक हमीवर बाहेर आला होता.
तक्रारदार कुटुंबावर मध्यरात्री हल्ला
शुक्रवारी रात्री आरोपी पीडित मुलीच्या घरी पोहोचला. दार उघडताच त्याने मुलीच्या आईवर चाकूने हल्ला करून हत्या केली. त्यानंतर घरात झोपलेल्या 60 वर्षीय आजीचीही हत्या केली. आरोपीने 16 वर्षीय मुलीला जबरदस्तीने गाडीत बसवून गावाजवळील तळ्याकाठी नेले आणि चाकूने वार करून तिचा खून केला. मृतदेह तिथेच टाकून तो पसार झाला.
पत्नी आणि दोन चिमुकल्यांचाही खून
यानंतर आरोपी स्वतःच्या घरी गेला आणि पत्नीचा गळा चिरून खून केला. त्यानंतर झोपेत असलेल्या 4 वर्षांच्या आणि 18 महिन्यांच्या दोन मुलांचीही हत्या केली. हत्येनंतर आरोपीने वडिलांना फोन करून गुन्ह्याची कबुली दिल्याची माहिती पोलिसांनी दिली आहे.
पोलिसांकडून आरोपीचा शोध सुरू
घटनेनंतर आरोपी कारसह फरार झाला असून त्याचा शोध घेण्यासाठी विशेष पथके तैनात करण्यात आली आहेत. या हत्येमागील नेमके कारण आणि आरोपीची मानसिक अवस्था याचाही तपास सुरू असल्याचे पोलिसांनी सांगितले.
तेलंगणा हत्याकांड, रंगारेड्डी हत्या प्रकरण, POCSO आरोपी, जामिनावर सुटलेला आरोपी, Hyderabad Crime News, Rangareddy Murder, Bail Accused, Crime News India, 6 Murders Telangana, Raju Kumar