मेक्सिकोचा मोठा टॅरिफ धक्का : 2026 पासून भारतासह आशियाई देशांच्या मालावर 50% पर्यंत शुल्क; भारतीय निर्यात क्षेत्रावर मोठा परिणाम
मेक्सिकोने 2026 पासून भारत आणि इतर आशियाई देशांमधून आयात होणाऱ्या 1,400 पेक्षा जास्त उत्पादनांवर 5% ते 50% पर्यंत आयात शुल्क लावण्याचा निर्णय घेतला आहे. या निर्णयामुळे भारतीय निर्यातीला मोठा फटका बसू शकतो, विशेषतः वाहन उद्योग आणि ऑटो कंपोनेंट क्षेत्राला, जे मेक्सिकोला भारताचे सर्वात मोठे निर्यात क्षेत्र मानले जाते.
1,400 आशियाई उत्पादनांवर वाढीव टॅरिफला मंजुरी
एसोसिएटेड प्रेसच्या माहितीनुसार, मेक्सिकोच्या सिनेटने 76-5 मतांनी हे विधेयक मंजूर केले. या वाढीव टॅरिफचा परिणाम त्या सर्व देशांवर होणार आहे ज्यांच्याशी मेक्सिकोचे औपचारिक व्यापार करार नाहीत. यामध्ये भारत, चीन आणि इतर अनेक आशियाई देशांचा समावेश आहे.
नवीन टॅरिफ दर जानेवारीपासून लागू
नवीन शुल्कामध्ये वस्त्र, शूज, इलेक्ट्रॉनिक उपकरणे, कार आणि कारचे सुटे भाग यांचा समावेश असेल. भारत आणि मेक्सिको यांच्यातील 2024-25 या काळातील द्विपक्षीय व्यापार 8.6 अब्ज डॉलर होता. सध्या मेक्सिको भारताचा 31वा मोठा व्यापार भागीदार आहे.
भारत-मेक्षितो व्यापारातील तफावत
2024 मध्ये भारताला मेक्सिकोसोबत 6 अब्ज डॉलरचे ट्रेड सरप्लस होते. भारताचा निर्यात व्यापार 6 अब्ज डॉलरने जास्त होता, तर मेक्सिकोमधून केवळ 2.6 अब्ज डॉलरचा आयात व्यापार झाला. टॅरिफ वाढल्यानंतर भारतीय औषधे, ऑटो पार्ट्स आणि वस्त्र उद्योगाशी संबंधित उत्पादने मेक्सिकोमध्ये आणखी महाग होण्याची शक्यता आहे.
मेक्सिकोची टॅरिफ रणनीती आणि अमेरिकेचा दबाव
हे टॅरिफ राष्ट्राध्यक्ष क्लाउडिया शीनबाउम यांच्या दुसऱ्या कार्यकाळात लागू करण्यात येत आहेत. त्यांची सरकार पाश्चिमात्य दबाव-विशेषतः अमेरिकेच्या व्यापार धोरणांपासून-बचाव करण्याचा प्रयत्न करत आहे. चीन आणि इतर आशियाई देशांवर वाढते शुल्क लागू केल्याने ही रणनीती अधिक गुंतागुंतीची झाली आहे.
भारतावर अमेरिकेचा आधीच टॅरिफ दबाव
भारताला ट्रम्प-युगातील वाढीव आयात शुल्कामुळे आधीच फटका बसला आहे. नवीन आर्थिक तणाव कमी करण्यासाठी नवी दिल्ली प्रयत्नशील असताना, मेक्सिकोचा हा निर्णय भारतीय कंपन्यांसाठी नव्या आव्हानांची मालिका घेऊन आला आहे.
वाहन आणि फार्मा उद्योगाला सर्वाधिक फटका
मेक्सिकोला भारताचा सर्वात मोठा निर्यात विभाग म्हणजे तयार वाहने. यात हुंडई क्रेटा, किआ, मारुती सुजुकी, स्कोडा आणि फॉक्सवैगनच्या अनेक मॉडेल्सचा समावेश आहे. तसेच ऑटो पार्ट्सही मोठ्या प्रमाणात निर्यात केले जातात. मेक्सिकोमध्ये सध्या 250 हून अधिक भारतीय कंपन्या कार्यरत आहेत.
भारतीय गुंतवणुकीत वाढ
ब्लूमबर्गच्या अहवालानुसार गेल्या वर्षी भारतीय गुंतवणूक 650 दशलक्ष डॉलरपर्यंत पोहोचली. मेक्सिकोमधील भारतीय राजदूत पंकज शर्मा यांनी याआधी म्हटले होते, “आपल्या दोन्ही देशांमधील व्यापार क्षमता यापेक्षा खूप मोठी आहे. आता एकमेकांवर अधिक लक्ष देण्याची वेळ आली आहे.”
मेक्सिकोचा हा निर्णय बदलत्या जागतिक व्यापार समीकरणाचे द्योतक मानला जात आहे आणि भारतीय उद्योगांसाठी आगामी काळात मोठे आर्थिक आव्हान उभे राहण्याची शक्यता तज्ज्ञांनी व्यक्त केली आहे.