चित्रकूटमध्ये पुराचा हाहाकार; मंदाकिनी नदीला पूर, 700 हून अधिक नागरिकांचे रेस्क्यू, मुख्यमंत्री मोहन यादवांची आपत्कालीन बैठक
मध्य प्रदेश आणि उत्तर प्रदेशच्या सीमावर्ती भागात सुरू असलेल्या मुसळधार पावसामुळे पूरस्थिती गंभीर झाली आहे. नद्या आणि नाले दुथडी भरून वाहत असून अनेक भागांचा मुख्य रस्त्यांशी संपर्क तुटला आहे. चित्रकूटमध्ये परिस्थिती सर्वाधिक गंभीर असून मंदाकिनी नदीच्या पाणीपातळीत मोठी वाढ झाली आहे. रामघाटसह आसपासच्या परिसरात पुराचे पाणी शिरले आहे.
सतना जिल्ह्यातील चित्रकूटमध्ये पूरस्थिती निर्माण झाल्यानंतर NDRF आणि SDRFच्या पथकांनी बचावकार्याला वेग दिला आहे. आतापर्यंत 700 हून अधिक नागरिकांना सुरक्षित स्थळी हलवण्यात आले आहे.
मंदाकिनी नदीच्या पाणीपातळीत वाढ
चित्रकूटमधील पूरस्थितीबाबत जिल्हाधिकारी डॉ. सतीश कुमार यांनी सांगितले की, आता पाणीपातळी हळूहळू कमी होत आहे. रात्री पुन्हा मुसळधार पाऊस झाला नाही, तर परिस्थिती नियंत्रणात राहण्याची शक्यता आहे. प्रशासनाकडून संपूर्ण परिस्थितीवर बारकाईने लक्ष ठेवण्यात येत आहे.
पूराचे पाणी पूर्वी 139 मीटरपर्यंत नोंदवण्यात आले होते. त्यानंतर आज दुपारी सुमारे 2 वाजता पाणीपातळी 146 मीटरपर्यंत पोहोचली. मात्र त्यानंतर पाणीपातळीत घट होण्यास सुरुवात झाली.
अनेक घरांमध्ये पाणी शिरल्याने नागरिकांनी घरांच्या छतांवर आश्रय घेतला. त्यानंतर SDRF आणि NDRFच्या दोन स्थानिक पथकांनी तातडीने बचावकार्य सुरू केले.
रस्ते संपर्क तुटल्याने बचावकार्यात अडथळे
पूरामुळे अनेक रस्ते पाण्याखाली गेल्याने बचाव पथकांना प्रभावित भागांपर्यंत पोहोचण्यात अडचणी निर्माण झाल्या. परिस्थिती लक्षात घेऊन राज्य सरकारने केंद्र सरकारच्या मदतीने हवाई बचाव अभियान राबवले.
हेलिकॉप्टरच्या मदतीनेही नागरिकांना सुरक्षित स्थळी हलवण्यात आले. उर्वरित नागरिकांना बचाव नौकांच्या माध्यमातून बाहेर काढण्यात आले.
मुख्यमंत्री मोहन यादवांची आपत्कालीन बैठक
चित्रकूटमधील पूरस्थितीचा आढावा घेण्यासाठी मध्य प्रदेशचे मुख्यमंत्री मोहन यादव यांनी रीवा येथे संबंधित अधिकाऱ्यांसोबत आपत्कालीन बैठक घेतली.
मुख्यमंत्री म्हणाले की, मुसळधार पावसामुळे सिमरावल आणि मंदाकिनी नद्यांच्या पाणीपातळीत वाढ झाली असून सतना आणि चित्रकूटमध्ये पूरस्थिती निर्माण झाली आहे. परिस्थितीची माहिती मिळताच बचाव पथके तातडीने तैनात करण्यात आली आणि जिल्हा प्रशासनाने प्रभावीपणे बचावकार्य केले.
6 हजारांहून अधिक अन्नपॅकेटचे वाटप
मुख्यमंत्र्यांच्या माहितीनुसार, आतापर्यंत सुमारे 700 नागरिकांना सुरक्षित बाहेर काढण्यात आले आहे. यापैकी दोन जणांना हेलिकॉप्टरच्या मदतीने, तर इतर नागरिकांना बचाव नौकांच्या माध्यमातून सुरक्षित करण्यात आले.
पूरग्रस्त नागरिकांसाठी चित्रकूटमध्ये निवारा केंद्रे उभारण्यात आली असून 6 हजारांहून अधिक अन्नपॅकेटचे वाटप करण्यात आले आहे.
दरम्यान, पूरस्थितीमुळे अद्याप कोणतीही जीवितहानी झाल्याची माहिती नाही. रात्रीही मदत आणि बचावकार्य सुरू राहणार आहे. मुख्यमंत्री मोहन यादव यांनी नागरिकांच्या सुरक्षिततेसाठी सरकारकडून आवश्यक ती सर्व मदत केली जात असल्याचे सांगितले. तसेच ते उद्या स्वतः चित्रकूटला भेट देऊन परिस्थितीचा प्रत्यक्ष आढावा घेणार आहेत.