Maharashtra political update : अजित पवार की, शरद पवार ? आमदारांची उद्या अग्नी परीक्षा…
मुंबई : राष्ट्रवादीचे नेते अजित पवार यांनी महाराष्ट्रातील शिंदे सरकारला पाठिंबा दिल्यानंतर आणि नंतर राज्याचे उपमुख्यमंत्री झाल्यानंतर त्यांना नेमके किती आमदार पाठिंबा देणार याबाबत संभ्रम आहे. उद्या बुधवारी चित्र स्पष्ट होऊ शकते. शरद पवार यांच्या नेतृत्वाखालील राष्ट्रवादी काँग्रेस आणि अजित पवार यांच्या गटाने बुधवारी स्वतंत्र बैठका बोलावल्या आहेत.
शरद पवार आणि त्यांचे पुतणे अजित पवार यांच्याकडे किती आमदार आहेत, हे या सभांमधून उद्या स्पष्ट होईल, अशी अपेक्षा आहे. पीटीआय या वृत्तसंस्थेनुसार, शरद पवार यांनी आमदार, खासदार आणि पक्षाच्या कार्यकर्त्यांची दक्षिण मुंबईतील वायबी चव्हाण सेंटर येथे दुपारी १ वाजता बैठक बोलावली आहे, तर अजित पवार यांच्या गटाची बैठक सकाळी ११ वाजता उपनगरीय वांद्रे येथील मुंबई एज्युकेशन ट्रस्टच्या (एमईटी) परिसरात होणार आहे.
रविवारी १ जुलै रोजी अजित पवार यांच्यासह राष्ट्रवादीच्या आठ आमदारांनी मंत्रीपदाची शपथ घेतली. अजित पवार यांना ४० आमदार पाठिंबा देत असल्याचा दावा करण्यात आला होता. शिवाय अजित पवार गटाचे नेते प्रफुल्ल पटेल यांनी पुन्हा ४० हून अधिक आमदारांचा पाठिंबा असल्याचा दावा आज केला आहे.
दोन्हीही गटाचे वेगवेगळे दावे
शिवसेना-भाजप मंत्रिमंडळात उपमुख्यमंत्रीपदाची शपथ घेतल्यानंतर अजित पवार यांनी हा राष्ट्रवादीचा एकत्रित निर्णय असल्याचा दावा केला होता. त्यांना सर्व ५३ आमदारांचा आशीर्वाद असल्याचा दावा त्यांनी केला होता. मात्र, अजित पवार यांना केवळ १३ आमदारांचा पाठिंबा असल्याचे सांगत शरद पवार गटाने हा दावा फेटाळून लावला.
२८८ सदस्यांच्या महाराष्ट्र विधानसभेत राष्ट्रवादीचे एकूण ५३ आमदार आहेत. पक्षांतरविरोधी कायद्यातील तरतुदींना सामोरे जावे लागू नये म्हणून अजित पवारांना किमान ३६ आमदारांच्या पाठिंब्याची गरज आहे. अजित पवार यांच्या गटात १ जुलै रोजी दावा करण्यात आला होता की, ३६ आमदारांच्या पाठिंब्याच्या पत्रांवर सह्या आहेत. त्याचवेळी महाराष्ट्र सरकारचा भाग असलेल्या भाजपने अजित पवारांना ४० हून अधिक आमदारांचा पाठिंबा असल्याचा अंदाज व्यक्त केला आहे.
अजितदादांच्या सोबत गेलेल्या ३ आमदारांनी घेतला यू-टर्न !
महाराष्ट्र सरकारमध्ये सामील झालेले अजित पवार यांच्यासह ९ आमदार वगळता इतर आमदार शरद पवार यांच्याशी एकनिष्ठ असल्याचा दावा शरद पवार यांच्या कॅम्पने केला आहे. अजित पवार यांच्यासोबत असल्याचे समजले जाणारे आमदार सरोज अहिरे, प्राजक्त तनपुरे आणि सुनील भुसारा यांनी नंतर शरद पवार यांची भेट घेऊन पाठिंबा देण्याचे आश्वासन दिले. आदल्या दिवशी राष्ट्रवादीचे प्रवक्ते क्लाईड क्रॅस्टो यांनी अजित पवारांना केवळ १३ आमदारांचा पाठिंबा असल्याचा दावा केला होता.
शरद पवारांच्या भेटीत कोणाला बोलावलंय?
महाराष्ट्र राष्ट्रवादी काँग्रेसचे अध्यक्ष जयंत पाटील यांनी प्रसारमाध्यमांना सांगितले की, सर्व आमदार त्यांच्या (शरद पवार यांच्या नेतृत्वाखालील गट) सोबत आहेत आणि ते उद्या (५ जुलै) कळेल. या बैठकीला सर्व पदाधिकारी, राष्ट्रवादी काँग्रेस पार्टीचे फ्रंट सेलचे प्रमुख, जिल्हाप्रमुख, तालुकास्तरीय कार्यकर्ते, आमदार, आमदार, खासदार यांना उपस्थित राहण्यास सांगण्यात आल्याचे पाटील यांनी सांगितले.