IndiaNewsUpdate : कुस्तीपटू लैंगिक छळ प्रकरण : ब्रिजभूषण शरण सिंग यांच्या अडचणीत वाढ , तपस प्रगतीपथावर

नवी दिल्ली : दिल्ली पोलिसांच्या सूत्रानुसार, या प्रकरणी दाखल झालेल्या एफआयआरप्रकरणी येत्या दोन-तीन दिवसांत आरोपपत्र दाखल केले जाईल. एका अल्पवयीन पैलवान मुलीसह एकूण ६ महिला कुस्तीपटूंनी ब्रिजभूषण शरण सिंग आणि इतर काही आरोपींविरुद्ध नवी दिल्ली अंतर्गत कॅनॉट प्लेस पोलीस ठाण्यात गुन्हा दाखल केला होता, त्यानंतर दिल्ली पोलिसांनी एसआयटी पथकाची स्थापना केली होती. आरोपांचा पुरावा म्हणून या कुस्तीपटूंनी अनेक ऑडिओ, व्हिडिओ रेकॉर्डिंग दिल्ली पोलिसांना सादर केले आहेत. याप्रकरणी पोलिसांना १५ जूनपूर्वी आरोपपत्र दाखल करायचे आहे.

भारतीय कुस्ती महासंघाचे माजी अध्यक्ष ब्रिजभूषण शरण सिंग यांच्याविरोधात दिल्ली पोलिसांचे पथक तपास करत आहे. या प्रकरणी तपासासाठी पुरावे गोळा करण्यासाठी दिल्ली पोलिसांच्या पथकाने हरियाणा, पंजाब, दिल्ली, उत्तर प्रदेश, झारखंडसह अनेक राज्यांना भेटी देऊन डझनभर लोकांचे जबाब नोंदवले आहेत. पुरावे गोळा करताना दिल्ली पोलिसांसमोरही अनेक आव्हाने आहेत, कारण हे प्रकरण अनेक वर्षे जुने आहे. वर्षे जुने प्रकरण असल्याने व्हिडिओ फुटेज आणि ते पुरावे गोळा करणे आणि आरोप सिद्ध करणे हे मोठे आव्हान आहे.

विदेशातही तपासाची व्याप्ती

या प्रकरणातील आणखी एक मोठी समस्या म्हणजे पीडितेने तिच्यासोबत परदेशात लैंगिक छळ झाल्याची तक्रार केली होती. त्यामुळे या प्रकरणातील तपासाची व्याप्ती इंडोनेशिया, बल्गेरिया, मंगोलिया, कझाकस्तान येथे झालेल्या कुस्ती स्पर्धेच्या माहितीसाठीही तपासण्यात येत असून संबंधित अधिकाऱ्यांशी संबंधित लोकांचे जबाब नोंदवण्याचे प्रयत्न सुरू आहेत. या देशांच्या कुस्ती महासंघांकडून मागितलेला तपशील १५ जूनपर्यंत मिळू शकत नाही, असे पोलिस अधिकाऱ्यांचे म्हणणे आहे. १५ जूनपर्यंत दिल्ली पोलीस या प्रकरणी आपला अहवाल सादर करतील. आता पोलीस १५ जूननंतर परदेशातून मिळालेले तपशील पुरवणी आरोपपत्रात दाखल करू शकतात.

२०० लोकांचे जबाब नोंदवले

दरम्यान माहितीनुसार, आरोप करणाऱ्या ६ महिला कुस्तीपटूंपैकी ४ महिलांनी हे पुरावे पोलिसांना दिले आहेत. पोलिसांसमोर केलेल्या तक्रारीत या महिलांनी ब्रिजभूषण यांच्यावर चुकीच्या उद्देशाने त्यांना ‘स्पर्श’ केल्याचा आरोप केला होता, त्यानंतर पोलिसांनी त्यांना आरोपांच्या समर्थनार्थ पुरावे सादर करण्यास सांगितले होते. रविवारी या महिला कुस्तीपटूंनी आरोपांची पुष्टी करण्यासाठी दृकश्राव्य पुरावे पोलिसांना दिले. या प्रकरणी पोलिसांनी आतापर्यंत तक्रारदार कुस्तीपटू, प्रशिक्षक, रेफ्री आणि ब्रिजभूषण शरण सिंह यांचे सहकारी यांच्यासह सुमारे २०० लोकांचे जबाब नोंदवले आहेत. अलीकडेच डब्ल्यूएफआयचे अध्यक्ष ब्रजभूषण शरण यांच्या अडचणी वाढताना दिसत होत्या जेव्हा दिल्ली पोलिसांनी महिला कुस्तीपटूंच्या आरोपांची चौकशी करण्यासाठी ५ देशांच्या कुस्ती महासंघांची मदत घेतली होती. दिल्ली पोलिसांनी या पाच देशांच्या महासंघांना पत्र लिहून व्हिडिओ आणि फोटो आदींची माहिती मागवली आहे.