Rajsthan : कर्तव्यावर असलेल्या पोलिसांचा खून , हल्लेखोर पसार
राजस्थानमधील राजसमंदमध्ये कर्तव्यावर असलेल्या पोलीस हेड कॉन्स्टेबलचा अज्ञातांनी केलेल्या मारहाणीत मृत्यू झाला आहे. जनतेचे रक्षण करणारे पोलीसच सुरक्षित नाहीत, तर सर्वसामान्यांचे काय? असा प्रश्न आता उपस्थित होऊ लागला आहे. भीम पोलीस ठाण्यात कार्यरत अब्दुल गनी (वय ४५) हे एका प्रकरणाच्या चौकशीसाठी शनिवारी संध्याकाळी पाचच्या सुमारास घटनास्थळी गेले होते. तिथे काही जणांनी अचानक गनी यांच्यावर लोखंडी सळई आणि लाठ्याकाठ्यांनी हल्ला चढवला. त्यानंतर हल्लेखोर तेथून पसार झाले. या हल्ल्यात गनी गंभीर जखमी झाले. काही गावकऱ्यांनी याबाबत पोलीस ठाण्यात माहिती दिली.
पोलीस घटनास्थळी पोहोचले. गनी यांना सरकारी रुग्णालयात दाखल करण्यात आले. उपचार सुरू असतानाच त्यांचा मृत्यू झाला. गनी हे जहाजपूरचे असून, त्यांच्या मृत्यूबाबत कुटुंबीयांना कळवण्यात आले आहे, अशी माहिती पोलिसांनी दिली. हल्लेखोर नक्की कोण होते? त्यांची नावे अद्याप समोर आली नाहीत, असेही पोलिसांनी सांगितले.