WorldNewsUpdate : मतदानातून न्यायाधीशाची निवड करणाऱ्या संसदेत विरोध करण्यासाठी लोकच संसदेत घुसले !!

मेक्सिको हा जगातील पहिला देश बनला आहे जिथे आता सार्वजनिक मतदानाद्वारे न्यायाधीशांची निवड केली जाईल. लोकांच्या प्रचंड विरोधानंतर यासंबंधीचा प्रस्ताव संसदेत मंजूर करण्यात आला. अशा परिस्थितीत आता तिथले लोक मतदान करून सर्व स्तरावर न्यायाधीश निवडू शकतील. मात्र सरकारचा हा निर्णय आता त्यांच्यासाठी फासाचा ठरला आहे.

मेक्सिकोच्या सत्ताधारी मोरेना पक्षाने संसदेत मांडलेल्या या प्रस्तावाच्या बाजूने 86 आणि विरोधात 41 मते पडली, त्यानंतर हा प्रस्ताव मंजूर करण्यात आला. लोक रस्त्यावर उतरून या प्रस्तावाला विरोध करत आहेत. यामध्ये कायद्याचे विद्यार्थी आणि न्यायालयीन कर्मचाऱ्यांचा मोठ्या प्रमाणात समावेश आहे.

दरम्यान मेक्सिकोच्या सिनेटने मंजूर केलेल्या या विधेयकांतर्गत सर्वोच्च न्यायालयापासून स्थानिक स्तरापर्यंतच्या सर्व न्यायालयांचे न्यायाधीश सार्वजनिक मतदानाने निवडले जातील. हे विधेयक मंजूर करण्यात राष्ट्राध्यक्ष आंद्रेस मॅन्युएल लोपेझ ओब्राडोर यांची मोठी भूमिका होती. ते त्यांच्या कार्यकाळात मंजूर करून घ्यायचे होते. कारण देशाची सध्याची न्यायव्यवस्था विशिष्ट उच्चभ्रू वर्गाचे हित साधते, असे त्यांचे मत आहे.

लोपेझ यांचा अध्यक्षपदाचा कार्यकाळ ३० सप्टेंबर रोजी संपत आहे. अशा स्थितीत त्यांनी घाईघाईने हे विधेयक आपल्या कार्यकाळात संसदेत मंजूर करून घेण्याचा निर्णय घेतल्याचे बोलले जात आहे.

या प्रस्तावाला मंजुरी मिळाल्यानंतर आता सत्ताधारी सरकार घटनादुरुस्ती करणार असून, त्यामुळे न्यायपालिकेच्या निवडणुकीचा मार्ग मोकळा होणार आहे. आता देशातील 6500 हून अधिक न्यायाधीश आणि न्यायदंडाधिकारी जनतेच्या थेट मतांनी निवडले जातील. याशिवाय, न्यायाधीश किंवा न्यायदंडाधिकारी होण्यासाठी आवश्यक असलेला 10 वर्षांचा अनिवार्य अनुभवही पाचवर आणला जाईल. त्यामुळेच लोक रस्त्यावर उतरून विरोध करत आहेत.

विधेयकाच्या निषेधार्थ जमाव संसदेत घुसला

हा प्रस्ताव सिनेटमध्ये मांडण्याच्या एक दिवस आधी विरोधक जमाव संसदेत घुसला होता. मंगळवारी हजारो निदर्शकांनी मेक्सिकोच्या संसदेत प्रवेश केला आणि ते मंजूर होण्यापासून रोखण्याचा प्रयत्न केला. यावेळी आंदोलकांनी संसद भवनाची तोडफोडही केली, त्यामुळे खासदार घाबरले आणि त्यांनी जवळच्या इमारतीत आश्रय घेतला. यावेळी आंदोलकांनी न्यायव्यवस्था कोसळणार नाही अशा घोषणा दिल्या. यावेळी विरोधी पक्षाचे नेते आणि न्यायालयीन कार्यकर्तेही सहभागी झाले होते. त्यानंतर कडक पोलीस बंदोबस्तात संसदेचे कामकाज सुरू करण्यात आले.

मात्र या विरोधाकडे दुर्लक्ष करीत बुधवारी सत्ताधारी मुरैना पक्षाने हा प्रस्ताव मंजूर करण्यासाठी आवश्यक दोन तृतीयांश बहुमत मिळवले. मेक्सिकोच्या नवनिर्वाचित क्लॉडिया सेनबॉम या 1 ऑक्टोबर रोजी राष्ट्राध्यक्षपदाची सूत्रे स्वीकारणार आहेत. मोरेना पार्टीच्या या योजनेला क्लॉडियाचा पूर्ण पाठिंबा आहे. इतकंच नाही तर मेक्सिकोच्या विरोधी पक्षाचे नेते मिगुएल एंजेल युनेस यांनीही या पावलाला पाठिंबा देण्याची घोषणा केली आहे, त्यानंतर विरोधी पक्षाने आपल्याच नेत्याला देशद्रोही ठरवलं आहे.

राष्ट्राध्यक्ष ओब्राडोर यांनी या विधेयकासाठी वकिली का केली?

राष्ट्राध्यक्ष ओब्राडोर यांच्या कार्यकाळात त्यांनी अनेक वेळा सर्वोच्च न्यायालयाशी संघर्ष केला. त्यांच्या सहा वर्षांच्या कार्यकाळात त्यांनी ऊर्जा आणि सुरक्षा क्षेत्रात सुचवलेले काही बदल न्यायालयाने रोखले.

मेक्सिकन सिनेटने मंजूर केलेल्या या प्रस्तावावर अमेरिकेनेही चिंता व्यक्त केली असून याला लोकशाहीसाठी धोका असल्याचे म्हटले आहे. या निर्णयामुळे देशातील न्यायव्यवस्था नष्ट होईल, असे अमेरिकेचे म्हणणे आहे. भ्रष्टाचार वाढेल आणि न्याय संपेल.