जेट इंधन दरवाढीचा फटका; देशांतर्गत विमानप्रवास महागणार? इंडिगोची ५ ते ७% उड्डाण कपात

देशांतर्गत विमान प्रवास करणाऱ्या प्रवाशांसाठी पुढील तीन महिने अडचणीचे ठरण्याची शक्यता आहे. वाढते परिचालन खर्च आणि जेट इंधनाच्या वाढलेल्या किमतींमुळे IndiGo ने जून ते ऑगस्टदरम्यान देशांतर्गत उड्डाण क्षमता ५ ते ७ टक्क्यांनी कमी करण्याचा निर्णय घेतला आहे. यापूर्वी Air India नेही देशांतर्गत सेवेत मोठी कपात जाहीर केली होती.

इंडिगो सध्या दररोज सुमारे २२०० उड्डाणे चालवते. त्यापैकी सरासरी ११० देशांतर्गत उड्डाणे कमी करण्यात येणार आहेत. त्यामुळे विमानांमधील उपलब्ध जागा कमी होऊन तिकिटांचे दर वाढण्याची शक्यता व्यक्त केली जात आहे.

इराण-अमेरिका संघर्षामुळे जागतिक स्तरावर जेट इंधनाच्या किमती वाढल्या आहेत. याचा थेट परिणाम विमान वाहतूक उद्योगावर झाला आहे. जेट इंधन हा विमान कंपन्यांच्या एकूण खर्चातील जवळपास २५ टक्के हिस्सा असतो.

इंडिगोने बंगळुरू, हैदराबाद, चेन्नई आणि कोलकाता येथून होणाऱ्या देशांतर्गत उड्डाणांमध्ये कपात करण्याचा निर्णय घेतला आहे. प्रत्येक विमानतळावरून दररोज १० ते १५ फेऱ्या कमी होण्याची शक्यता आहे.

वाढत्या खर्चामुळे इंडिगोने आधीच आंतरराष्ट्रीय क्षमतेत सुमारे १७ टक्के कपात केली आहे. मात्र, पश्चिम आशिया आणि इतर आंतरराष्ट्रीय मार्गांवर विस्तार वाढवण्यावर कंपनीचा भर असल्याचे समजते.

एअर इंडियाने देशांतर्गत सेवेत २२ टक्के कपात केल्याने ७५० पेक्षा अधिक उड्डाणे कमी होणार आहेत. Air India Express देखील आपल्या देशांतर्गत उड्डाणांपैकी सुमारे १० टक्के उड्डाणे कमी करणार आहे.

या तीन प्रमुख विमान कंपन्यांचा एकत्रित बाजारपेठेतील हिस्सा जवळपास ९० टक्के आहे. त्यामुळे दहापैकी नऊ हवाई प्रवाशांवर या निर्णयाचा परिणाम होणार आहे.

भारत मोठ्या प्रमाणावर कच्च्या तेलाची आयात करतो. त्यामुळे जागतिक बाजारातील दरवाढ आणि रुपयातील घसरण यांचा दुहेरी फटका भारतीय विमान कंपन्यांना बसत आहे.

साधारणपणे जुलै ते सप्टेंबरदरम्यान देशांतर्गत विमान प्रवासाची मागणी कमी होते. त्यामुळे विमान कंपन्या दरवर्षी सुमारे १० टक्के क्षमता कमी करतात. मात्र, यंदाची कपात नेहमीपेक्षा अधिक असल्याने प्रवाशांच्या खर्चात वाढ होण्याची शक्यता आहे.