IndiaNewsUpdate : मुख्य निवडणूक आयुक्तांना दिली गेली झेड सुरक्षा …
नवी दिल्ली : आयबीच्या सूचनेला गांभीर्याने घेऊन मुख्य निवडणूक आयुक्त राजीव कुमार यांना आता ‘झेड’ श्रेणीची सुरक्षा मिळणार आहे. केंद्रीय गृह मंत्रालयाच्या सूत्रांनी दिलेल्या माहितीनुसार, इंटेलिजन्स ब्युरो (IB) च्या गुप्तचर अहवालाच्या आधारे मुख्य निवडणूक आयुक्तांची सुरक्षा वाढवण्यात आली आहे. मात्र , गृह मंत्रालयाने आयबीच्या सूचना अहवालाची तपशीलवार माहिती मीडियाला दिली नाही.
Z श्रेणी सुरक्षा प्रोटोकॉल अंतर्गत, आता राजीव कुमार यांच्या सुरक्षेसाठी CRPF कमांडोसह एकूण 33 सुरक्षा कर्मचारी तैनात केले जातील. यामध्ये कुमार यांच्या निवासस्थानी तैनात असलेले 10 सशस्त्र स्थिर रक्षक, चोवीस तास सुरक्षा पुरवणारे सहा खाजगी सुरक्षा अधिकारी (पीएसओ) आणि तीन शिफ्टमध्ये काम करणारे 12 सशस्त्र एस्कॉर्ट कमांडो यांचा समावेश असेल. याशिवाय कुमारच्या सुरक्षिततेची खात्री करण्यासाठी प्रत्येक शिफ्टमध्ये दोन वॉचर्स आणि तीन प्रशिक्षित ड्रायव्हर स्टँडबायवर असतील.
सध्याची राजकीय परिस्थिती हेही एक कारण आहे…
दरम्यान लोकसभा निवडणुकीपूर्वी राजकीय वातावरणात वाढता गोंधळ पाहता राजीव कुमार यांची सुरक्षा वाढवण्याचा हा निर्णय घेण्यात आला आहे. कारण तृणमूल काँग्रेससारखे विरोधी पक्ष निवडणूक आयोगाविरोधात सातत्याने आंदोलन करत आहेत.
मुख्य निवडणूक आयुक्त राजीव कुमार हे 1984 च्या बॅचचे निवृत्त आयएएस अधिकारी आहेत. त्यांनी 15 मे 2022 रोजी 25 वे सीईसी म्हणून पदभार स्वीकारला. तत्पूर्वी, त्यांची 1 सप्टेंबर 2020 रोजी निवडणूक आयोगात निवडणूक आयुक्त म्हणून नियुक्ती करण्यात आली होती. निवृत्त होण्यापूर्वी, त्यांच्या प्रशासकीय कार्यकाळात, त्यांनी आपला बहुतेक वेळ बिहार आणि झारखंडमध्ये घालवला.