मोबाईल देण्यास नकार दिल्याने पत्नीचा भोसकून खून
पत्नीने मोबाइल देण्यास नकार दिल्याने पतीने पत्नीची चाकूने भोसकून निर्घृण हत्या केल्याचा धक्कादायक प्रकार घडला आहे. . चेंबूरच्या म्हाडा कॉलनीत हा प्रकार घडला. जेम्स जॉन कुर्रेया (५१) असं या आरोपीचं नाव आहे. जेम्स हा दारुच्या प्रचंड नशेतच घरी आला होता. घरात पाय ठेवताच त्याने पत्नी राबिया हिला फोन मागितला. त्यावर तिने मोबाइल देण्यास नकार दिला. त्यामुळे संतापलेल्या जेम्सने राबिया यांना शिवीगाळ करण्यास सुरुवात केली. त्यामुळे दोघांमध्ये प्रचंड वादावादी झाल्याने भडकलेल्या जेम्सने किचनमध्ये जाऊन धारदार चाकू आणला आणि राबियावर सपासप वार केले.
चाकूच्या हल्ल्यापासून वाचण्यासाठी राबिया सैरावैरा धावत सुटली. तिने जोरजोरात आरडाओरड केली. मात्र, शेजारी वाचवण्यासाठी येण्याच्या आधीच राबिया यांचा मृत्यू झाला होता. दरम्यान, शेजारी आणि राबियाच्या नातेवाईकांनी हिंमत करून जेम्सला पकडले आणि पोलिसांच्या हवाली केले. आरसीएफ पोलिसांनी त्याला अटक केली असन त्याच्याविरोधात भादंवि कलम ३०२ अन्वये गुन्हा दाखल केला आहे. याप्रकरणी आरसीएफचे पोलीस निरीक्षक सोपान निगोत हे अधिक तपास करत आहेत. राबिया ही जेम्सची दुसरी पत्नी होती. त्याची पहिली पत्नी मानखुर्द येथे राहते.