मुख्यमंत्र्यांचा फुसका गौप्यस्फोट, आरोप खोटे असल्याचा पवारांचा पलटवार
मुख्यमंत्री देवेंद्र फडणवीस यांनी राष्ट्रवादी काँग्रेस पक्षाचे अध्यक्ष शरद पवार यांच्या ईडी नोटीसवर मोठा गौप्यस्फोट केला होता. काही लोकांना कर्ज मिळावे यासाठी शरद पवार यांनी शिखर बँकेला पत्र पाठवले होते. या पत्रांच्या निर्देशानुसार पात्र नसलेल्या लोकांनाही कर्ज देण्यात आल्याचे देवेंद्र फडणवीस यांनी ‘न्यूज18 लोकमत’ या वृत्तवाहिनीला दिलेल्या मुलाखतीत म्हटले होते. मुख्यमंत्र्यांच्या या गौप्यस्फोटावर शरद पवार त्यांनी प्रत्युत्तर दिले आहे. मी कधीही कोणत्याही संस्थेला पत्र पाठवलेले नाही, असे स्पष्टीकरण शरद पवार यांनी दिले आहे. त्याचबरोबर मुख्यमंत्र्यांनी केलेले आरोप खोटे असल्याचे शरद पवार म्हणाले.
‘जिल्हा बँकांना आर्थिक सहाय्य करण्याची जबाबदारी नाबार्डची आहे. अडचणीत आलेल्या बँकांच्या पुनरुज्जीवनासाठी नाबार्डने काही गाईडलाईन्स दिल्या आहेत. याच गाईडलाईन्सच्या आधारावर राज्य सहकार बँकेने काही संस्थेला मदत करण्याचा निर्णय घेतला. मी बँकेचा संचालक नाही. त्यामुळे या बँकेच्या निर्णय प्रक्रियेशी माझा संबंध नाही. ज्या संस्थांना बँकेने पैसे दिले त्यांच्याशीही माझा काही संबंध नाही. त्याचबरोबर मी कोणत्याही संस्थेला पत्र पाठवलेले नाही. मुख्यमंत्र्यांचे आरोप खोटे आहेत’, असे शरद पवार म्हणाले.