IndiaAghadiNewsUpdate : ‘इंडिया’चा समन्वयक ठरला नाही , गांधी जयंतीला जाहीर होणार जाहीरनामा …
मुंबई : लोकसभा निवडणुकीच्या पार्श्‍वभूमीवर भाजप विरुद्ध इंडिया या संयुक्त विरोधी आघाडीची दोन दिवसीय बैठक शुक्रवारी (1 सप्टेंबर) मुंबईत संपली. दरम्यान, या बैठकीत समन्वयकाच्या मुद्द्यावर औपचारिक चर्चा झाली नसल्याने हे नाव जाहीर करण्यात आले नाही. इंडिया आघाडीची चौथी बैठक दिल्ली , भोपाळ किंवा चेन्नई येथे होऊ शकते असे सांगण्यात येत आहे.
सूत्रांनी दिलेल्या माहितीनुसार, अनौपचारिक चर्चेत ‘इंडिया’ आघाडीच्या संयोजकपदासाठी तीन नेत्यांची नावे समोर आली. बिहारचे मुख्यमंत्री नितीश कुमार, पश्चिम बंगालच्या मुख्यमंत्री ममता बॅनर्जी आणि तामिळनाडूचे मुख्यमंत्री एमके स्टॅलिन अशी ही तीन नावे आहेत. एकमत झाले असते तर मुंबईत घोषणा झाली असती, पण एका नावावर एकमत होऊ शकले नाही.
विरोधी आघाडीच्या ‘इंडिया’ची पुढची बैठक कुठे होणार?
‘इंडिया’ची पुढील बैठक दिल्ली, चेन्नई किंवा भोपाळमध्ये होऊ शकते. सूत्रांनी दिलेल्या माहितीनुसार, 2 ऑक्टोबरला म्हणजेच महात्मा गांधी जयंतीनिमित्त दिल्लीतील सर्व नेते राजघाटावर एकत्र येणार आहेत. 2 ऑक्टोबर रोजी बापूंना अभिवादन केल्यानंतर ‘इंडिया’ आघाडीचा एक छोटा जाहीरनामा प्रसिद्ध करण्याची योजना आहे. यामध्ये सामान्य जनतेशी संबंधित मोठ्या आश्वासनांचा समावेश असेल असे सांगण्यात येत आहे. दरम्यान मध्य प्रदेशच्या निवडणुकीत काँग्रेसला फायदा व्हावा यासाठी आघाडीची पुढील बैठक भोपाळमध्ये आयोजित करण्याचा प्रस्ताव असल्याचे सूत्रांनी सांगितले. आगामी सभांसोबतच मोठा मोर्चा काढण्याची व्यूहरचना आखली जात आहे.
विरोधी आघाडी ‘इंडिया’ची ही तिसरी बैठक मुंबईत झाली. पहिली बैठक 23 जून रोजी बिहारमधील पाटणा येथे नितीश कुमार यांनी आयोजित केली होती. दुसरी बैठक जुलैमध्ये बेंगळुरू येथे झाली, जिथे तिला ‘इंडियन नॅशनल डेव्हलपमेंटल इन्क्लुसिव्ह अलायन्स’ (इंडिया) असे नाव देण्यात आले.
पाच समित्यांची घोषणा
मुंबईत झालेल्या ‘इंडिया’ आघाडीच्या तिसऱ्या बैठकीत समन्वय समिती, प्रचार समिती, सोशल मीडियासाठी कार्यगट, मीडियासाठी कार्यगट, संशोधनासाठी कार्य गट तयार करण्यात आला. संयुक्त पत्रकार परिषद घेऊन विरोधी पक्षनेत्यांनी भाजपविरोधात एकत्र असल्याचा पुनरुच्चार केला. या बैठकीला काँग्रेस अध्यक्ष मल्लिकार्जुन खर्गे, माजी पक्षाध्यक्ष राहुल गांधी, टीएमसी प्रमुख ममता बॅनर्जी, डीएमके अध्यक्ष एमके स्टॅलिन, जेडीयू नेते नितीश कुमार आणि आरजेडी प्रमुख लालू यादव यांच्यासह अनेक नेते उपस्थित होते.