Uttar Pradesh : पत्नीवरील अनैतिक संबंधाच्या संशयावरून त्याने स्वतःसहित सर्व कुटुंब संपविले , गाझियाबाद मधील 5 जणांच्या एकत्रित मृत्यूने खळबळ
पत्नीचे दुसऱ्या पुरुषासोबत अनैतिक संबंध आहेत या संशयातून पतीने तिच्यासह संपूर्ण कुटुंबाला संपवले. उत्तर प्रदेशच्या गाझियबाद शहरातील शताब्दी नगरमध्ये गुरुवारी ही धक्कादायक घटना घडली. पतीने पत्नीसह तीन मुलांना विष पाजून मारले. कुटुंबाला संपवल्यानंतर प्रदीपने (३७) स्वत: आत्महत्या करुन जीवन संपवले. सकाळी ५.४० च्या सुमारास पोलिसांना या घटनेबद्दल कळवण्यात आले.
त्यानंतर पोलिसांनी दरवाजा तोडून घरामध्ये प्रवेश केला. प्रदीपला दारुचे व्यसन होते. पत्नीवर तो सतत संशय घ्यायचा. पत्नीचे दुसऱ्या माणसासोबत प्रेमप्रकरण सुरु असल्याचा त्याच्या मनात संशय होता अशी माहिती पोलिसांनी दिली. शताब्दी पुरम भागातील मसुरी पोलीस स्टेशनच्या हद्दीत ही घटना घडली.
पोलिसांनी घटनास्थळी एक चिठ्ठी सापडली असून त्यात प्रदीपने आपण इतके टोकाचे पाऊल का उचलत आहोत त्याविषयी खुलासा केला आहे. प्रदीप आणि त्याच्या दोन मुलांचा जागीच मृत्यू झाला होता. पत्नी आणि तिसऱ्या मुलाची प्रकृती गंभीर होती. रुग्णालयाच्या वाटेवर असताना त्या दोघांचा मृत्यू झाला.
इचलकरंजीत पत्नीने पतीच्या डोक्यात दगड घालून केली हत्या
इचलकरंजी येथे पत्नीने पतीच्या डोक्यात दगड घालून हत्या केल्याचा प्रकार समोर आला आहे. इचलकरंजी शहरालगत असलेल्या यद्राव गावात आर. के. नगर परिसरात ही घटना शुक्रवारी सकाळी 11 वाजता घडली. शिवाजी विठोबा देवेकर (वय 48) असे मृत व्यक्तीचे नाव आहे. गीता देवेकर ( वय 42) असे संशयित आरोपी महिलेचे नाव आहे.
गीता देवेकर व बाळू उर्फ शिवाजी दिवेकर यांच्यात वारंवार भांडण होत असे. मद्यपी पतीकडून होणाऱ्या वादाला कंटाळून पत्नीने दगड घालून हत्या केली असल्याची माहिती सूत्रांनी दिली. पती संशय घेत असल्याची तक्रार होती. घटनास्थळी शहापूर पोलीस दाखल झाले असून गीता दिवेकर यांना पोलिसांनी घेतले ताब्यात घेतले आहे. पोलीस पुढील कारवाई करत आहेत.