भाजपनेते जनार्दन रेड्डींविरोधात आरोपपत्र दाखल : पोंझी घोटाळा
पोंझी घोटाळाप्रकरणी केंद्रीय गुन्हे विभागाने अॅबिडंट मार्केटिंग आणि अन्य नऊ जणांविरोधात आरोपपत्र दाखल केले असून, यामध्ये कर्नाटकचे माजी मंत्री आणि भाजप नेते जनार्दन रेड्डी यांचे नावही समाविष्ट करण्यात आलं आहे. दिवाणी न्यायालयात ४ हजार ८०० पानांचं आरोपपत्र दाखल करण्यात आलं असून, १० हजार ५६४ जणांची फसवणूक केल्याचं या आरोपपत्रात म्हटलं आहे. याचप्रमाणे ४ हजार ८०० गुंतवणूकदारांची विस्तृत माहिती या आरोपपत्रात पोलिसांनी दिली आहे. या पोंझी योजनेत ४ हजार ८०० गुंतवणूकदारांनी ८२.१ कोटी रुपयांची गुंतवणूक केली होती. केंद्रीय गुन्हे विभागाने दाखल केलेल्या आरोपपत्रात जनार्दन रेड्डी, अॅबिडंट मार्केटिंगचे व्यवस्थापक सैय्यद फरीद अहमद आणि सैय्यद अफाक अहमद, उद्योजक वीज टाटा, रेड्डी यांचे साहाय्यक मेहफूज अली खान, सोने व्यापारी रमेश उर्फ बल्लारी रमेश, कंपनीचे अधिकारी इनायत उल्ला वहाब आणि अशरफ अली यांच्या नावांचा समावेश करण्यात आला आहे.
पोंझी घोटाळा १२० कोटींचा असून, यामधील आरोपींच्या ५९ कोटींच्या मालमत्ता जप्त करण्याचे निर्देश केंद्रीय गुन्हे विभागाने जिल्हा प्रशासनाला दिले आहेत. यामध्ये जनार्दन रेड्डी यांचा सदनिकेचा समावेश असून, याची किंमत ५ कोटी असल्याचे सांगण्यात येत आहे.