“माफ कर देना भी हर बार सही नही होता”

बिग बी- तापसी घेणार ‘बदला’; ट्रेलर प्रदर्शित

बॉलिवूडचे महानायक अमिताभ बच्चन आणि अभिनेत्री तापसी पन्नू यांची मुख्य भूमिका असलेल्या ‘बदला’चित्रपटाचा ट्रेलर प्रदर्शित झाला आहे.
‘बदला लेना हर बार सही नही होता, लेकीन माफ कर देना भी हर बार सही नही होता,’ बॉलिवूडचे महानायक अमिताभ बच्चन यांच्या आवाजातील या डायलॉगने ट्रेलरची सुरुवात होते. बादल गुप्ता नावाच्या एका ज्येष्ठ वकीलाच्या भूमिकेत अमिताभ बच्चन दिसत आहेत. ४० वर्षांत एकही केस न हरलेले बादल गुप्ता तापसीला एका खूनाच्या गुन्ह्यात अडकण्यापासून वाचवण्याचा प्रयत्न करताना दिसत आहेत. परंतु, त्या बंद खोलीत नेमकं घडलं काय ? तो खून कोणाच्या हातून आणि का घडला? या सगळ्या प्रश्नांची उत्तरं शोधण्याचा प्रयत्न चित्रपटातील वेगवान घडामोडींमध्ये जाणवतो.
अमिताभ आणि तापसीची मुख्य भूमिका असणाऱ्या या चित्रपटाचे दिग्दर्शन सुजॉय घोष करणार आहे. शाहरुख खानच्या रेड चिलीज एंटरटेन्मेंटने अजूर एंटरटेन्मेंटसोबत मिळून या चित्रपटाची निर्मिती केली आहे. येत्या ८ मार्चला हा चित्रपट प्रदर्शित होणार आहे.