MaharashtraPoliticalNewsUpdate : राहुल नार्वेकर यांचे सुनावणीचे वेळापत्रक जाहीर… अंतिम युक्तिवाद डिसेंबरमध्ये…
मुंबई : विधानसभा अध्यक्ष राहुल नार्वेकर यांनी अखेर शिवसेनेच्या अपात्र आमदारांच्या त्यांच्यासमोरील सुनावणीचे वेळा पत्रक जाहीर केले असून ६ ऑक्टोबर पासून ते २३ नोव्हेंबर पर्यंत ही सुनावणी चालणार असल्याचे त्यांनी म्हताले आहे. या प्रकरणी निर्णय घेण्यास विलंब होत असल्याच्या कारणावरून नुकतेच सुप्रीम कोर्टाने विधानसभा अध्यक्षांना फटकारले होते. त्यानंतर आता राहुल नार्वेकर यांच्याकडून वेगवान हालचाली सुरू झाल्याचे दाखवण्यासाठी अखेर सुनावणीच्या कामकाजाचे वेळापत्रक जाहीर केलं आहे. ठाकरे गटाचे वकील असीम सरोदे यांनी याबाबतची माहिती सोशल मीडियातून दिली आहे.
असे आहे वेळापत्रक
६ ऑक्टोबर २०२३ – याचिकाकर्ते मूळ शिवसेना उद्धव ठाकरे गटातर्फे २३ सप्टेंबर रोजी दाखल करण्यात आलेल्या अतिरिक्त प्रतिज्ञापत्रावर एकनाथ शिंदे गटाचे वकील त्यांचे उत्तर/म्हणणे दाखल करतील.
१३ ऑक्टोबर – अपात्रतेबाबतच्या सगळ्या पिटीशनची सुनावणी एकत्र व्हावी या ‘मूळ शिवसेना उद्धव ठाकरे गटातर्फे’ मागणी करण्यात आलेल्या अर्जावर, २३ सप्टेंबर २०२३ रोजी ‘मूळ शिवसेना उद्धव ठाकरे गटातर्फे’ अतिरिक्त युक्तिवाद व कागदपत्रे रेकॉर्डवर आणण्याऱ्या अर्जावर दोन्ही पक्षांनी आपले लेखी म्हणणे मांडावं आणि नंतर त्यावर युक्तिवाद होतील.
१३ ऑक्टोबर ते २० ऑक्टोबर –
अपात्रतात सुनावणीबाबत विधानसभा सचिवालयात दाखल असलेल्या कागदपत्रांची, आदेशांची पाहणी करण्यासाठी, कागदपत्रे शोधण्यासाठी दोन्ही पक्षांच्या वकिलांना संधी देण्यात येईल. (म्हणजे हा कालावधी केवळ ऑफिशियल कागदपत्रे पाहणी करण्यासाठी आहे)
२० ऑक्टोबर –
अपात्रतेबाबतच्या सगळ्या पिटीशनची सुनावणी एकत्र व्हावी, २३ सप्टेंबर २०२३ रोजी ‘मूळ शिवसेना उद्धव ठाकरे गटातर्फे’ अतिरिक्त युक्तिवाद आणि कागदपत्रे रेकॉर्डवर आणण्याची मागणी करणाऱ्या ‘मूळ शिवसेना उद्धव ठाकरे गटातर्फे’ दाखल अर्जांवर विधानसभा अध्यक्ष राहुल नार्वेकर निर्णय आदेश जाहीर करतील.
२७ ऑक्टोबर –
दाखल झालेल्या कागदपत्रांपैकी कोणते डॉक्युमेंट्स ऍडमिट करायचे आणि कोणते नाकारायचे यावर दोन्ही पक्षांनी आपापले म्हणणे सादर करावे. (म्हणजे यादिवशी काही कामकाज होणार नाही तर केवळ लेखी म्हणणे सादर करण्याची कार्यालयीन प्रक्रिया होईल)
६ नोव्हेंबर –
अपात्रतेबाबत निर्णय घेताना काय मुद्दे विचारात घेतले पाहिजेत यावर दोन्ही पक्षांनी आपले लेखी म्हणणे सादर करावे व एकमेकांना त्याच्या कॉपीज द्याव्यात.
१० नोव्हेंबर –
अपात्रतेबाबत निर्णय घेताना काय मुद्दे विचारात घेऊन नक्की केले पाहिजेत यावर विधानसभा अध्यक्ष दोन्ही बाजूंचे युक्तिवाद ऐकतील.
२० नोव्हेंबर –
प्राथमिक तपासणी (examination in chief) घेण्यासाठी दोन्ही पक्षांनी त्यांच्या साक्षीदारांची यादी आणि प्रतिज्ञापत्र दाखल करावेत. (म्हणजे यादिवशी सुद्धा काहीही न होता केवळ प्रक्रिया पूर्ण केली जाईल)
२३ नोव्हेंबर –
या तारखेपासून उलट-तपासणी (cross examination) सुरू होईल व आवश्यकतेनुसार तसेच दोन्ही पक्षांच्या वकिलांच्या सोयीनुसार तारखा देण्यात येतील. शक्य असेल त्याप्रमाणे उलट-तपासणी (cross examination) आठवड्यातून दोनदा घेण्यात येईल.
•अंतिम युक्तिवाद-
सगळ्यांचे म्हणणे-पुरावे ऐकून घेण्याची वरील सर्व प्रक्रिया संपल्यावर दोन आठवड्यानंतर अंतिम सुनावणीसाठी तारीख ठरवली जाईल.
( वरील वेळापत्रक कुणाचीही विशेष अडचण नसल्यास व कुणी सुनावणी तहकुबीचा अर्ज न दिल्यास शक्यतोवर ठरलेल्या तारखांनुसार पार पाडली जाईल आणि तारखांमध्ये काही बदल झाल्यास तसे वकिलांना कळवले जाईल असे विधानसभा सचिवालयाने विधानसभा अध्यक्षांच्या सहीने जाहीर कळवले आहे.)