ElectionNewsUpdate : हिमाचलच्या निवडणूक जाहीर , गुजरात तारखांबाबत आयोगाचा धक्का …
नवी दिल्ली : निवडणूक आयोगाने हिमाचल प्रदेश विधानसभा निवडणुकीच्या तारखा जाहीर केल्या आहेत. हिमाचल प्रदेशबरोबरच गुजरात विधानसभेचीही तारीख निवडणूक आयोग जाहीर करेल, अशी अपेक्षा होती, पण तसे झाले नाही. हिमाचल प्रदेश विधानसभेची मुदत ८ जानेवारी २०२३ रोजी संपणार आहे तर गुजरात विधानसभेची मुदत २३ फेब्रुवारी २०२३ रोजी संपणार आहे. अशा स्थितीत दोन्ही राज्यांच्या निवडणुकांच्या तारखा एकाच वेळी जाहीर होतील, अशी अपेक्षा होती, मात्र आयोगाने आज गुजरातच्या तारखा जाहीर न करून सर्वांनाच आश्चर्याचा धक्का दिला. दोन्ही विधानसभांचा कार्यकाळ सहा महिन्यांत संपत आहे. पारंपारिकपणे अशा प्रकरणांमध्ये राज्यांमध्ये एकाच वेळी निवडणुका जाहीर केल्या जातात आणि त्याच तारखेला निकाल जाहीर केले जातात.
हिमाचलसह गुजरात विधानसभा निवडणुका जाहीर न झाल्याबद्दल मुख्य निवडणूक आयुक्त राजीव कुमार म्हणाले की परंपरा, मतदानाच्या तारखा आणि हवामानातील फरक यासह विविध घटकांचा विचार करून हा निर्णय घेण्यात आला आहे. आयोगाने म्हटले आहे की, अनेक राज्यांतील निवडणुकांच्या घोषणेमुळे काहींच्या निकालांची प्रतीक्षा करावी लागते, तर आदर्श आचारसंहितेचा कालावधीही अधिक वाढतो. ते म्हणाले की, दोन्ही राज्यांच्या विधानसभांचा कार्यकाळ संपण्यास सुमारे ४० दिवसांचे अंतर आहे. नियमांनुसार, तो किमान ३० दिवसांचा असावा जेणेकरून एका निकालाचा दुसऱ्यावर परिणाम होणार नाही. हवामानासारखे अनेक घटक आहेत. आम्हाला हिमाचल प्रदेशात बर्फवृष्टी सुरू होण्यापूर्वी निवडणुका घ्यायच्या आहेत. आयोगाने सर्वांचा सल्ला घेतल्याचे मुख्य निवडणूक आयुक्तांनी सांगितले. आदर्श आचारसंहितेचा कालावधीही ७० दिवसांवरून ५७ दिवसांवर आणण्यात आला आहे.
तसेच, २०१९ मध्ये, दोन्ही राज्यांमध्ये (हिमाचल आणि गुजरात) नोव्हेंबरच्या सुरुवातीला मतदान झाले आणि डिसेंबरमध्ये निकाल जाहीर झाले. गुजरातमध्ये दोन टप्प्यात मतदान झाले. उल्लेखनीय आहे की हिमाचलमधील विधानसभा निवडणुकीची अधिसूचना १७ ऑक्टोबर रोजी जारी केली जाणार आहे. उमेदवारी अर्ज भरण्याची अंतिम तारीख २५ ऑक्टोबर आहे. २७ ऑक्टोबर रोजी उमेदवारी अर्जांची छाननी होणार असून २९ ऑक्टोबरपर्यंत उमेदवारांना त्यांची नावे मागे घेता येणार आहेत. पर्वतीय राज्यात १२ नोव्हेंबरला मतदान होणार आहे, तर मतमोजणी ८ डिसेंबरला होणार आहे. हिमाचलमध्ये सध्या भाजपची सत्ता आहे. राज्यात विधानसभेच्या ६८ जागा असून बहुमताचा आकडा ३५ आहे. हिमाचल प्रदेशमध्ये २०१७ मध्ये ६८ जागांवर झालेल्या विधानसभा निवडणुकीत भाजपला ४४ तर काँग्रेसला २१ जागा मिळाल्या होत्या. तीन जागा इतरांच्या खात्यात गेल्या. हिमाचलमधील ६८ जागांपैकी ४८ जागा सर्वसाधारण प्रवर्गासाठी, १७ अनुसूचित जाती (SC) आणि ३ अनुसूचित जमाती (ST) साठी राखीव आहेत.