CongressNewsUpdate : निवडणुकांवर लक्ष ठेवण्यासाठी काँग्रेसकडून ‘ ईगल ‘ समितीची स्थापना , महाराष्ट्रातून या नेत्याचा समावेश
नवी दिल्ली : निवडणूक आयोगाने आयोजित केलेल्या निवडणुकांवर लक्ष ठेवण्यासाठी काँग्रेसने एक समिती स्थापन केली आहे. काँग्रेस पक्षाने रविवारी (२ फेब्रुवारी २०२५) ईगल (Empowered Action Group of Leaders and Experts) समितीची घोषणा केली. काँग्रेसने तात्काळ प्रभावाने ईगल समितीला कार्यरत केले आहे. यामध्ये महारक्षत्रातून डॉ. नितीन राऊत यांचा समावेश करण्यात आला आहे.
ईगल समिती प्रथम महाराष्ट्र मतदार यादीच्या प्रकरणाची चौकशी करेल आणि त्यांचा संपूर्ण अहवाल काँग्रेस नेतृत्वाला सादर करेल. याशिवाय, काँग्रेसची ‘ईगल’ समिती इतर राज्यांमध्ये झालेल्या निवडणुकांचे विश्लेषण देखील करेल. यासोबतच, ते राज्यांमधील आगामी निवडणुकांवरही लक्ष ठेवेल. ईगल टीमचे मुख्य काम मुक्त, निष्पक्ष आणि पारदर्शक निवडणुका घेण्यावर भर देणे असेल.
‘ईगल’ समितीचे सदस्य
काँग्रेसच्या या विशेष समितीमध्ये निवडक लोकांना स्थान देण्यात आले आहे. या टीममध्ये समाविष्ट असलेल्या नेत्यांमध्ये पहिले नाव दिल्ली काँग्रेसचे ज्येष्ठ आणि शक्तिशाली नेते अजय माकन यांचे आहे. दुसरे नाव मध्य प्रदेशचे माजी मुख्यमंत्री आणि काँग्रेसचे ज्येष्ठ नेते दिग्विजय सिंह यांचे आहे. डॉ. अभिषेक मनु सिंघवी तिसऱ्या स्थानावर आहेत. त्यानंतर, अनुक्रमे प्रवीण चक्रवर्ती, पवन खेरा, गुरदीप सिंग सप्पल, डॉ. नितीन राऊत आणि चल्ला वंशी चंद रेड्डी यांची नावे समाविष्ट आहेत.
काँग्रेसला ‘ईगल’ची गरज का पडली?
२०२४ च्या लोकसभा निवडणुकीपासून ते राज्यांमध्ये झालेल्या विधानसभा निवडणुकांपर्यंत काँग्रेसने अनियमिततेचे आरोप केले होते. या प्रकरणाची निवडणूक आयोगाकडून चौकशी करण्याची मागणीही पक्षाने केली होती. यामध्ये, ईव्हीएमद्वारे मतदान हा एक मोठा मुद्दा म्हणून उदयास आला. गेल्या अनेक वर्षांपासून केंद्रात सत्तेबाहेर असलेली काँग्रेस निवडणूक आयोगावर निष्पक्ष निवडणुका न घेतल्याचा आरोप सातत्याने करत आहे.