State Assembly Election Result Live : देशातील पाच राज्याच्या विधानसभा निवडणुकीचे आज निकाल …
नवी दिल्ली : संपूर्ण देशाचे लक्ष लागलेल्या उत्तर प्रदेश, उत्तराखंड, गोवा, मणिपूर आणि पंजाब या पाच राज्यातील विधानसभा निवडणुकीच्या मतमोजणीला आज सकाळी ८ वाजता प्रारंभ होत आहे. निवडणूक आयोगाच्या सूचनेनुसार कोविड-19 च्या मार्गदर्शक तत्त्वांचे पालन करून, हि मतमोजणी सुरु होईल . दुपारपर्यंत निकालाचा कौल लक्षात येण्याची शक्यता आहे. या पाच राज्यांतील विधानसभा निवडणुकांसाठी 10 फेब्रुवारी ते 7 मार्च दरम्यान अशा सात टप्प्यांत मतदान पार पडले.
पाच राज्यांतील या विधानसभा निवडणुकीच्या मतमोजणीसाठी 50,000 हून अधिक अधिकारी तैनात करण्यात आले आहेत. तर या प्रक्रियेवर देखरेख ठेवण्यासाठी पाच राज्यांमध्ये 650 हून अधिक मतमोजणी निरीक्षक तैनात करण्यात आले आहेत. दरम्यान लोकसंख्येनुसार देशातील सर्वात मोठ्या राज्यात 403 विधानसभेच्या जागा असलेल्या यूपीमध्ये सात टप्प्यात मतदान झाले. उत्तराखंडमध्ये 70, पंजाबमध्ये 117, मणिपूरमध्ये 60 आणि 40 विधानसभेच्या जागांसाठी निवडणूक झाली आहे. मतमोजणीसाठी सुमारे 1,200 मतमोजणी हॉल तयार करण्यात आले आहेत जेथे इलेक्ट्रॉनिक व्होटिंग मशीन (EVM) द्वारे निकाल नोंदवले जातील.
आयोगाच्या मार्गदर्शक सूचनांनुसार, मतमोजणी प्रक्रियेपूर्वी आणि नंतर मतमोजणी केंद्रे स्वच्छ केली जातील. सामाजिक अंतराच्या मार्गदर्शक तत्त्वांची खात्री करण्यासाठी काउंटिंग हॉल हवेचा योग्य प्रवाह, खिडक्या आणि एक्झॉस्ट फॅन्ससह पुरेसे मोठे असावे.पूर्ण लसीकरण करूनही, एखाद्याला ताप किंवा सर्दी यांसारखी कोविडची लक्षणे आढळल्यास, त्याला मतमोजणी केंद्रात प्रवेश दिला जाणार नाही. प्रत्येक मतमोजणी अधिकारी आणि सुरक्षा कर्मचार्‍यांना मास्क, सॅनिटायझर, फेस शील्ड आणि हातमोजे प्रदान केले जातील.
1. UTTAR PRADESH | एकूण जागा : 403 | बहुमतासाठी लागणार आकडा : 202
2. PUNJAB । एकूण जागा : 117 । बहुमतासाठी लागणार आकडा : 59
3. GOA । एकूण जागा : 40 । बहुमतासाठी लागणार आकडा : 21
4. MANIPUR । एकूण जागा : 60 । बहुमतासाठी लागणार आकडा : 31
5. UTTARAKHAND । एकूण जागा : 70 । बहुमतासाठी लागणार आकडा : 36
असे होते एक्झिट पोलचे दावे , किती खरे किती खोटे आज लागणार निकाल !!
उत्तर प्रदेश, उत्तराखंड, गोवा, मणिपूर आणि पंजाब या पाच राज्यांत निवडणुका होत असताना पंजाब वगळता उर्वरित चार राज्यांत भाजप सरकार स्थापनेचा प्रबळ दावेदार मानला जात आहे. 7 मार्च रोजी मतदानाच्या शेवटच्या टप्प्यानंतर, एक्झिट पोल देखील साधारणपणे भाजपच्या बाजूने आहेत. मात्र, उत्तराखंड आणि गोव्यातील जागांसाठी चुरशीची लढत होण्याची शक्यता आहे.
देशाच्या राजकारणात आघाडीची भूमिका बजावणाऱ्या यूपीच्या एक्झिट पोलच्या सर्वेक्षणानुसार (तिन्ही एजन्सींच्या एक्झिट पोलची सरासरी) भाजप आणि मित्रपक्षांना 232 जागा, काँग्रेसला 4 आणि बसपाला 17 जागांवर यश मिळेल तर समाजवादी पक्ष आणि त्यांच्या मित्रपक्षांना 150 जागा मिळू शकतात.
एक्झिट पोलच्या पोलनुसार पंजाबमध्ये आम आदमी पार्टी (आप) बहुमत मिळवू शकते. त्यात सुमारे 70 जागा मिळू शकतात आणि सध्या सत्ताधारी काँग्रेसला केवळ 25 जागांवर समाधान मानावे लागू शकते. भाजपची सर्वात वाईट कामगिरी पंजाबमध्येच होण्याची शक्यता आहे.
उत्तराखंडमधील एक्झिट पोलच्या सर्वेक्षणानुसार काँग्रेस आणि सत्ताधारी भाजपमध्ये निकराची लढत पाहायला मिळू शकते. तरीही बहुतांश अंदाजानुसार उत्तराखंडमध्ये भाजपला सर्वाधिक जागा मिळू शकतात. गोव्यातही एक्झिट पोलच्या सर्वेक्षणानुसार काँग्रेस आणि सत्ताधारी भाजपमध्ये चुरशीची लढत पाहायला मिळू शकते आणि दोन्ही पक्ष बहुमतापासून दूर राहू शकतात. मात्र, अंदाजानुसार भाजप सर्वात मोठा पक्ष म्हणून पुढे येईल. एक्झिट पोलच्या पोलनुसार, मणिपूरमध्ये सत्ताधारी भाजपला पुन्हा सरकार स्थापन करण्याची संधी मिळू शकते आणि काँग्रेसला भाजपच्या तुलनेत केवळ निम्म्या जागा मिळतील असे सांगण्यात येत आहे.