रॅप गायक बादशाह येतोय बॉलिवूडमध्ये

बॉलिवूडला आपल्या रॅप गाण्यांनी वेडं लावणारा गायक बादशाह आता नव्या भूमिकेत दिसणार आहे. तरुणाईचा हा लोकप्रिय ‘रॅप किंग’ आता चक्क अभिनेता बनणार आहे. ‘दबंग गर्ल’ सोनाक्षी सिन्हासोबत तो चित्रपटात मुख्य भूमिकेत दिसणार आहे. बादशाह आणि सोनाक्षीच्या या चित्रपटाचे नाव मात्र अद्याप गुलदस्त्यात आहे. याबाबत सांगताना बादशाह म्हणाला की, ‘हे वर्ष माझ्यासाठी खास आहे. या वर्षी मी निर्माता म्हणून पदार्पण केलं. शिवाय आता चित्रपटात कामही करणार आहे. ही भूमिका माझ्यासाठीच आहे असा विश्वास माझ्या निर्मात्यांना वाटतोय. हा एका वेगळ्याच धाटणीचा चित्रपट आहे ज्यामुळे माझ्या चेहऱ्यावर हसू येतं, मला आनंद वाटतो. शिवाय, सोनाक्षीसोबत काम करण्याबाबत मी प्रचंड उत्सुक आहे. ‘ या चित्रपटाचे शूटिंग पंजाबमध्ये सुरू होणार आहे. बादशाह या टीमला पंजाबमध्ये भेटून शूटिंग सुरू करणार आहे. ही भूमिका बादशाहच्या खऱ्या आयुष्याच्या जवळ जाणारी आहे. शिल्पी दास गुप्ता बादशाहच्या आगामी चित्रपटाचे दिग्दर्शन करणार आहेत.