IndiaNewsUpdate : संसद भवनातील महापुरुषांचे पुतळे हटविल्याने कॉँग्रेस आक्रमक , लोकसभा सचिवालयाने जारी केले कारण !!
नवी दिल्ली : लोकसभा निवडणुकीच्या २०२४ च्या निकालांनंतर विरोधी पक्षाचे नेते ॲक्शन मोडमध्ये आले आहेत. त्याच अनुषंगाने संसद भवनासमोरील छत्रपती शिवाजी महाराज, महात्मा गांधी आणि डॉ. भीमराव आंबेडकर यांचे पुतळे हटवण्यात आल्याचा आरोप काँग्रेसचे सरचिटणीस जयराम रमेश यांनी केला आहे.
या प्रकरणाबाबत, त्यांनी सोशल मीडिया प्लॅटफॉर्म X वर एक पोस्ट केली आहे ज्यामध्ये त्याने फोटो देखील टाकले आहेत. या पोस्टवर त्यांनी लिहिले आहे की, “संसद भवनासमोरील प्रमुख ठिकाणांहून छत्रपती शिवाजी महाराज, महात्मा गांधी आणि डॉ. बाबासाहेब आंबेडकर यांचे पुतळे हटवण्यात आले असून ही क्रूरता आहे.”
दरम्यान द टेलिग्राफच्या वृत्तानुसार, संसदेच्या संकुलातील लँडस्केपिंगच्या कामाचा भाग म्हणून महात्मा गांधी, डॉ. बी. आर . आंबेडकर आणि छत्रपती शिवाजी यांच्या पुतळ्यांचे स्थलांतर करण्यात आले आहे. या कारवाईवर काँग्रेसने गुरुवारी जोरदार टीका केली. आदिवासी नेते बिरसा मुंडा आणि महाराणा प्रताप यांचे पुतळेही जुने संसद भवन आणि संसदेच्या ग्रंथालयादरम्यानच्या लॉनमध्ये स्थलांतरित करण्यात आले असून सर्व पुतळे एकाच ठिकाणी आहेत.
Statues of Chhatrapati Shivaji Maharaj, Mahatma Gandhi, and Dr. Babasaheb Ambedkar have just been removed from their places of prominence in front of the Parliament House. This is atrocious. pic.twitter.com/NA12QjCBAK
— Jairam Ramesh (@Jairam_Ramesh) June 6, 2024
या प्रकरणी भाजपवर हल्लाबोल करताना काँग्रेसचे माध्यम आणि प्रसिद्धी विभागाचे प्रमुख पवन खेडा म्हणाले की, महाराष्ट्रातील मतदारांनी भाजपला मतदान केले नसल्याने संसदेतील छत्रपती शिवाजी महाराज आणि आंबेडकरांचे पुतळे त्यांच्या मूळ जागेवरून हटवण्यात आले. गुजरातमध्ये क्लीन स्वीप न झाल्याने त्यांनी संसदेतील महात्मा गांधींचा पुतळा मूळ जागेवरून हटवला, असे ते म्हणाले.
लोकसभा सचिवालयाने निवेदन केले जारी ….
दरम्यान यावर लोकसभा सचिवालयाने एक निवेदन जारी करून म्हटले आहे की, “नवीन संसद भवन बांधल्यानंतर, संसद संकुलाच्या सुशोभीकरणासाठी कृती आराखडा तयार करण्यात आला आहे. संसद परिसराच्या विविध भागात देशातील महान नेते आणि स्वातंत्र्यसैनिकांचे पुतळे बसवण्यात आले. संसदेच्या संकुलात वेगवेगळ्या ठिकाणी त्यांचे स्थान असल्याने या पुतळ्यांना पाहण्यासाठी पर्यटकांना अडचणी येत होत्या. यासाठीच या सर्व पुतळ्यांची प्रतिष्ठापना संसद भवन संकुलातच प्रेरणास्थान असलेल्या भव्य ठिकाणी करण्यात येत आहे.
लोकसभा सचिवालयाने आपल्या निवेदनात पुढे म्हणाले की, हे प्रेरणास्थान अशा प्रकारे विकसित केले जात आहे की संसद संकुलात येणारे पर्यटक या महान नेत्यांचे पुतळे सहज पाहू शकतील आणि त्यांच्या जीवनातून आणि तत्त्वज्ञानातून प्रेरणा घेऊ शकतील. खरे तर जुने संसद भवन आणि संसदेचे ग्रंथालय यांच्यामध्ये असलेल्या लॉनमध्ये आदिवासी नेते बिरसा मुंडा आणि महाराणा प्रताप यांचे पुतळेही बसवण्यात आले आहेत. आता सर्व पुतळे एकाच ठिकाणी आहेत. या महिन्यात 18व्या लोकसभेचे पहिले अधिवेशन सुरू होईल तेव्हा संसदेचे संकुल नव्या रूपात दिसणार आहे. संसदेच्या आतील चार इमारतींच्या एकत्रीकरणाचे काम सुरू आहे. बाहेरील भागाच्या पुनर्विकासाचा एक भाग म्हणून, महात्मा गांधी, शिवाजी आणि महात्मा ज्योतिबा फुले यांच्यासह राष्ट्रीय महापुरुषांचे पुतळे जुन्या संसद भवनाच्या गेट क्रमांक 5 जवळील लॉनमध्ये स्थलांतरित करण्याची योजना आहे, ज्याला विधान सदन असे नाव देण्यात आले आहे.
यामुळे नवीन संसद भवनाच्या प्रांगणासमोर एक प्रशस्त लॉन तयार करण्याचा मार्ग मोकळा होईल, ज्याचा वापर राष्ट्रपती आणि पंतप्रधान नवीन इमारतीत प्रवेश करण्यासाठी करतील. अर्थसंकल्पीय अधिवेशनादरम्यान संसदेच्या संयुक्त अधिवेशनाला राष्ट्रपतींचे अभिभाषण यांसारख्या अधिकृत समारंभांसाठीही या लॉनचा वापर केला जाऊ शकतो.