ICC Cricket World Cup 2023 Final : वर्ल्ड कपच्या अंतिम सामन्यासाठी नरेंद्र मोदी स्टेडियम सज्ज …
अहमदाबाद : संपूर्ण जगाचे लक्ष वेधून घेणारा भारत आणि ऑस्ट्रेलिया या दोन बड्या संघांमध्ये क्रिकेट वर्ल्ड कपचा अंतिम सामना उद्या अहमदाबादेत 19 नोव्हेंबरला होणार आहे. 1 लाख 32 हजार प्रेक्षक क्षमता असलेल्या जगातील सर्वांत मोठ्या म्हटल्या जाणाऱ्या, नरेंद्र मोदी स्टेडियममध्ये हा अंतिम सामना होत आहे. या सामन्याच्या पार्श्वभूमीवर अहमदाबादेत सध्या एखाद्या उत्सवासारखे वातावरण निर्माण झाले आहे. दुपारी 2 वाजता हा सामना सुरु होईल.
या अंतिम सामन्यात टीम इंडियासमोर ऑस्ट्रेलियाचे आव्हान असणार आहे. हा सामना ज्या मैदानावर होत आहे ते नरेंद्र मोदी स्टेडियम विश्वातील सर्वात मोठे क्रिकेट स्टेडियम आहे. नरेंद्र मोदी स्टेडियममध्ये 132000 प्रेक्षक सामना पाहू शकणार आहेत. याआधी ऑस्ट्रेलियाचे मेलबर्न क्रिकेट ग्राउंड हे जगातील सर्वात मोठे मैदान होते, पण आता या स्टेडियमने मेलबर्न क्रिकेट ग्राउंडला मागे टाकले आहे.
ICC ने नुकतेच नरेंद्र मोदी स्टेडियमचे काही फोटो शेअर केले आहेत. यामध्ये स्टेडियमची तयारी दाखवण्यात आली आहे. विश्वचषकाच्या अंतिम सामन्यासाठी भारतीय क्रिकेट नियामक मंडळाने जोरदार तयारी केली आहे. अंतिम सामन्यापूर्वी खेळपट्टी तपासण्यासाठी ऑस्ट्रेलियाचा कर्णधार पॅट कमिन्स शनिवारी नरेंद्र मोदी स्टेडियमवर पोहोचला. त्यांनी उपांत्य फेरीत दक्षिण आफ्रिकेचा पराभव केला. पॅट कमिन्स यांनीही ग्राउंड स्टाफशी बोलून माहिती घेतली.
भारत-ऑस्ट्रेलिया अंतिम सामन्यापूर्वी अहमदाबादमध्ये एअर शोचे आयोजन करण्यात येणार आहे. हे काम भारतीय हवाई दल करणार आहे. यानंतर आदित्य गढवी पहिल्या डावातील ड्रिंक्स ब्रेक दरम्यान परफॉर्म करेल. प्रीतम, जोनिता गांधी, नकाश अझीझ, अमित मिश्रा, आकासा सिंग आणि तुषार जोशी डावाच्या विश्रांतीदरम्यान कामगिरी करतील.
Captain Pat Cummins inspects the pitch ahead of the final 🔍#CWC23 #INDvAUS pic.twitter.com/ymBAK5o8x6
— ICC (@ICC) November 18, 2023
नरेंद्र मोदी स्टेडियमचा इतिहास
अहमदाबादमधील हे स्टेडियम हे मोटेरा स्टेडियम नावानेही ओळखले जाते. हे मैदान 1982 मध्ये पूर्ण झाले. पण, त्यावेळी मैदानात केवळ 49 हजार प्रेक्षक बसण्याची क्षमता होती. 2015 साली पंतप्रधान आणि गुजरात क्रिकेट असोसिएशनचे तत्कालीन अध्यक्ष नरेंद्र मोदी यांनी स्टेडियम पुन्हा नव्याने बांधण्याचा निर्णय घेतला. 2020 मध्ये स्टेडियम पूर्ण झाले. आता या स्टेडियममध्ये 132000 चाहते सामना पाहू शकतात. हे जगातील सर्वात मोठे क्रिकेट स्टेडियम आहे. यापूर्वी ऑस्ट्रेलियाचे मेलबर्न क्रिकेट ग्राउंड हे जगातील सर्वात मोठे मैदान होते, ज्यावर 90 हजार चाहत्यांना सामना पाहण्यासाठी व्यवस्था होती.
🏟️ The Narendra Modi Stadium.
One day to go! 😍#CWC23 pic.twitter.com/QIJc27NrZo
— ICC Cricket World Cup (@cricketworldcup) November 18, 2023
नरेंद्र मोदी स्टेडियमची खास वैशिष्ट्ये
हे मैदान सुमारे 63 एकरमध्ये पसरलेले आहे, याला 4 गेट आहेत. याशिवाय नरेंद्र मोदी स्टेडियममध्ये 4 ड्रेसिंग रूम आहेत. क्रिकेट स्टेडियममध्ये साधारणपणे दोन ड्रेसिंग रूम असतात. नरेंद्र मोदी स्टेडियममध्ये सरावासाठी 6 इनडोअर खेळपट्ट्या आहेत, तर 3 मैदानी खेळपट्ट्या बनवण्यात आल्या आहेत. या स्टेडियममध्ये क्रिकेट अकादमी आहे. या स्टेडियममध्ये चाहत्यांच्या बसण्यासाठी केलेली व्यवस्था उत्तम आहे.
ऐतिहासिक क्षणांचा साक्षीदार
हे मैदान अनेक मोठ्या विक्रमांचे साक्षीदार आहे. या मैदानावर सुनील गावस्कर यांनी 1986-87 मध्ये पाकिस्तानविरुद्ध 10 हजार कसोटी धावांचा आकडा गाठला होता. सुनील गावसकर हे कसोटी इतिहासात 10 हजार धावा करणारे पहिले फलंदाज होते. फेब्रुवारी 1994 मध्ये कपिल देव यांनी या मैदानावर सर्वाधिक विकेट घेण्याचा विक्रम केला होता, त्यांनी माजी भारतीय कर्णधार सर रिचर्ड हॅडली यांना मागे टाकले होते. यानंतर सचिन तेंडुलकरने 2013 मध्ये या मैदानावर 30 हजार आंतरराष्ट्रीय धावा केल्या. अमेरिकेचे तत्कालीन राष्ट्राध्यक्ष डोनाल्ड ट्रम्प फेब्रुवारी 2020 मध्ये भारतात आले होते, तेव्हा याच मैदानावर ‘नमस्ते ट्रम्प’ कार्यक्रमाचे आयोजन करण्यात आले होते.