CourtNewsUpdate : माजी खासदार विजय दर्डा आणि त्यांचा मुलगा देवेंद्र यांना कोळसा घोटाळा प्रकरणात चार वर्षांची शिक्षा
नवी दिल्ली : छत्तीसगडमधील कोळसा खाणी वाटपातील अनियमिततेशी संबंधित सीबीआय प्रकरणात दिल्लीच्या विशेष न्यायालयाने बुधवारी माजी राज्यसभा खासदार विजय दर्डा यांना ४ वर्षांच्या कारावासाची शिक्षा सुनावली. याच प्रकरणात त्यांचा मुलगा देवेंद्र दर्डा आणि मेसर्स जेएलडी यवतमाळ एनर्जी प्रायव्हेट लिमिटेडचे संचालक मनोज कुमार जैस्वाल यांनाही ४ वर्षांच्या कारावासाची शिक्षा सुनावण्यात आली आहे. तर याच प्रकरणात न्यायालयाने माजी कोळसा सचिव एचसी गुप्ता, दोन वरिष्ठ नागरी सेवक केएस क्रोफा आणि केसी समरिया यांनाही तीन वर्षांची शिक्षा सुनावली आहे.
या न्यायालयाने काँग्रेसचे माजी राज्यसभा खासदार विजय दर्डा आणि त्यांचा मुलगा देवेंद्र दर्डा यांना १५ लाख रुपयांचा दंडही ठोठावला आहे. मनोज कुमार जैस्वाल यांना १५ लाखांचा दंडही ठोठावण्यात आला आहे. तसेच माजी कोळसा सचिव एचसी गुप्ता यांना तीन वर्षांच्या शिक्षेव्यतिरिक्त १०,००० रुपयांचा दंड ठोठावण्यात आला आहे. सीबीआयने या प्रकरणातील दोषींना जास्तीत जास्त शिक्षा देण्याची मागणी केली होती.
या कलमांमध्ये न्यायालयाने आरोपींना दोषी ठरवले
यापूर्वी १३ जुलै रोजी न्यायालयाने विजय दर्डा आणि माजी कोळसा सचिवांसह अन्य पाच आरोपींना या प्रकरणात दोषी ठरवले होते. न्यायालयाने आरोपींना भारतीय दंड संहिता आणि भ्रष्टाचार प्रतिबंधक कायद्याच्या कलम १२० बी (गुन्हेगारी कट) आणि ४२० (फसवणूक आणि अप्रामाणिकपणे मालमत्तेचे वितरण) अंतर्गत दोषी ठरवले. दरम्यान सीबीआयने या प्रकरणात क्लोजर रिपोर्ट दाखल केला होता परंतु २०१४ मध्ये कोर्टाने तो स्वीकारण्यास नकार दिला आणि तपास एजन्सीद्वारे नव्याने चौकशी करण्याचे निर्देश दिले.
न्यायालयाने म्हटले होते की दर्डा यांनी तत्कालीन पंतप्रधान मनमोहन सिंग (ज्यांच्याकडे कोळसा खाते होते) त्यांच्या पत्रांमध्ये तथ्ये चुकीची मांडली होती. छत्तीसगडमधील फतेहपूर (पूर्व) कोळसा ब्लॉक जेएलडी यवतमाळ एनर्जी प्रायव्हेट लिमिटेडसाठी सुरक्षित करण्यासाठी त्यांनी हे केले. ३५ व्या स्क्रीनिंग कमिटीने कोळसा ब्लॉक जेएलडी यवतमाळ एनर्जीला दिला होता.