VBANewsUpdate : वंचित बहुजन आघाडीची 16 नावांची आणखी एक यादी जाहीर , औरंगाबाद पश्चिमचा उमेदवारही ठरला….
सातारा : विधानसभा निवडणुकीसाठी ‘वंचित’ उमेदवार जाहीर करण्यात आघाडी घेतली असून शनिवारी आणखी १६ नावांवर शिक्कामोर्तब केलं आहे. यामध्ये औरंगाबाद पश्चिम मधून अंजन साळवे यांच्यासह सिल्लोड मधून मनोहर जगताप , कन्नड मधून अय्याज मकबूल , पैठणमधून अरुण घोडके , गेवराईतून प्रियंका खेडकर , सातारा जिल्ह्यातील कऱ्हाड दक्षिणमधून संजय गाडे आणि कोरेगाव मतदारसंघात चंद्रकांत कांबळे यांना उमेदवारी दिली आहे. हे दोघेही ‘रिपाइं’ गवई गटाचे पदाधिकारी आहे. तर आतापर्यंत ‘वंचित’चे जिल्ह्यात तीन उमेदवार जाहीर झाले आहेत.
लोकसभा निवडणुकीप्रमाणेच वंचित बहुजन आघाडीने विधानसभेसाठीही तयारी केली आहे. त्यामुळे आतापर्यंत राज्यातील अनेक मतदारसंघातील उमेदवार जाहीर झाले आहेत. शनिवारी ‘वंचित’चे राष्ट्रीय अध्यक्ष अॅड. प्रकाश आंबेडकर यांनी राज्यातील १६ मतदारसंघाचे उमेदवार जाहीर केले. यामध्ये सातारा जिल्ह्यातील दोन मतदारसंघांचा समावेश आहे. संजय गाडे यांना कऱ्हाड दक्षिण मतदारसंघात उमेदवारी मिळाली आहे. याठिकाणी काॅंग्रेसकडून माजी मुख्यमंत्री पृश्वीराज चव्हाण हे रिंगणात उतरणार आहेत. तर भाजपकडून अतुल भोसले मैदानात असतील. कोरेगाव मतदारसंघातही ‘वंचित’ने चंद्रकांत कांबळे यांच्या गळ्यात उमेदवारीची माळ घातली आहे.
‘रिपाइं’ गवई गटाचे सातारा जिल्हाध्यक्ष संजय गाडे आहेत. तर याच पक्षाचे पश्चिम महाराष्ट्र महासचिव चंद्रकांत कांबळे आहेत. या दोघांनीही ‘वंचित’कडे उमेदवारीची मागणी केली होती.
वंचित बहुजन आघाडीच्या ९ आॅक्टोबरच्या दुसऱ्या यादीत माण विधानसभा मतदारसंघातील उमेदवाराची घोषणा करण्यात आली. इम्तियाज नदाफ यांना उमेदवारी मिळालेली आहे. त्यातच ‘वंचित’ जिल्ह्यातील सर्वच आठ मतदारसंघात उमेदवार उभे करणार आहे. उर्वरित मतदारसंघातील उमेदवारांची नावेही लवकरच जाहीर होतील, असेही ‘वंचित’कडून स्पष्ट करण्यात आलेले आहे.