MaharashtraCrimeNewsUpdate : धक्कादायक : चंद्रपूर जिल्ह्यात गतिमंद महिलेवर सामूहिक बलात्कार तर बुलढाणा जिल्ह्यात ४ शाळकरी मुलींवर शिक्षकाचा अत्याचार !!

बुलढाणा / चंद्रपूर : कोलकत्ता, बदलापूर येथील घटनेवरून राज्यात आणि देशभरात संतापाची लाट उसळली आहे. देशात,राज्यात महिला सुरक्षित आहेत काय ? असे प्रश्न उपस्थित होत असतानाच महाराष्ट्र पुन्हा हादरला आहे. चंद्रपूर जिल्हातील एका गतीमंद महिलेवर सामूहिक बलात्कार तर बुलढाणा जिल्ह्यातील सिंदखेडराजा तालुक्यातील वर्दडी येथील जिल्हापरिषद शाळेत चौथीच्या वर्गात शिकत असलेल्या चार विद्यार्थीनींवर शिक्षकाने अत्याचार केल्याचा संतापजनक प्रकार समोर आला आहे. यातील गतिमंद मुलीवरील सामूहिक बलात्काराची घटना चंद्रपूर जिल्हातील नागभीड येथे घडली आहे.

नागभीड येथील प्रकरणात पोलिसांनी पाच आरोपींना अटक केली आहे. ही घटना १२ ऑगस्ट २०२४ च्या मध्यरात्रीची आहे. पिडित महिला एकटी असल्याचे पाहून तिला आरोपींनी बसस्थानकातील प्रसाधनगृहात नेले आणि बळजबरीने अत्याचार केला. हा अत्याचार सुरू असतानाच दुसऱ्याने चित्रीकरण केले आणि चित्रफीत तयार केली. ही चित्रफीत यातील एका आरोपीने मित्राला पाठविली. या मित्राने ही चित्रफीत समाज माध्यमावर व्हायरल केली आणि शहरात एकच खळबळ उडाली आहे.

यासंदर्भात येथील काही सामाजिक संघटनांनी पुढाकार घेत आज ( शुक्रवार ) उपविभागीय अधिकारी दिनकर ठोसरे यांना निवेदन देऊन आरोपींना त्वरित अटक करून कारवाई करण्याची मागणी केली. चित्रफीतीत दिसणाऱ्या आरोपींचा शोध घेण्यासाठी पोलिसांनी वेगवेगळी पथके तयार करून काही तासात पाच आरोपींना अटक केली असून भारतीय दंड संहितेच्या कलम ६४ (२), (क), ७०(१) ८७, १२६(२), ३ (५) सहकलम ६७,(अ) अन्वये गुन्हा दाखल केला आहे. दरम्यान पोलिसांनी पिडित महिलेचा शोध घेऊन तिला वैद्यकीय तपासणीसाठी चंद्रपूर येथे पाठवले आहे.

दरम्यान पोलिस अधीक्षक मुमक्का सुदर्शन,अतिरिक्त पोलिस अधीक्षक रीना जनबंधू यांनी नागभीड येथे भेट दिली. तपासासंदर्भात मार्गदर्शन केले. अधिक तपास उपविभागीय पोलिस अधिकारी दिनकर ठोसरे यांच्या मार्गदर्शनाखाली ठाणेदार काचोरे करीत आहेत.

शिक्षकाकडूनच चार विद्यार्थीनींवर शिक्षकाने अत्याचार….

दुसऱ्या एका घटनेत सिंदखेडराजा तालुक्यातील वर्दडी येथील जिल्हापरिषद शाळेत चौथीच्या वर्गात शिकत असलेल्या चार विद्यार्थीनींवर शिक्षकाने अत्याचार केल्याचा संतापजनक प्रकार समोर आलाय. खुशाल उगले या 56 वर्षीय शिक्षकाने लैंगिक छळ केल्याची धक्कादायक घटना जिजाऊंचे जन्मस्थळ असलेल्या सिंदखेड राजा तालुक्यात घडली आहे. खुशालराव शेषराव उगले असे आरोपी शिक्षकाच नाव आहे.

पोस्को व अॅट्रॉसिटीसह विविध कल्मान्वये गुन्हे दाखल

या प्रकरणातील गुरु शिष्याच्या नात्याला काळीमा फासणाऱ्या नराधम शिक्षकाविरुद्ध किनगावराजा पोलिसांत पोस्को व अॅट्रॉसिटीसह विविध कल्मान्वये गुन्हे दाखल करण्यात आला आहे. मात्र आरोपी शिक्षक फरार असून त्याला पकडण्यासाठी पोलिसाचे एक पथक रवाना करण्यात आले आहे.

भिवंडीत खासगी बालिका आश्रमात चिमुरडीला चटके दिल्याच्या प्रकार

या शिवाय भिवंडीतील खासगी बालिका आश्रमात चिमुरडीला चटके दिल्याच्या धक्कादायक प्रकार समोर आला आहे. शोभा आश्रम असे खाजगी बालिका आश्रमचे नाव आहे. पीडीतेच्या आजीच्या तक्रारीवरून भोईवाडा पोलीस ठाण्यात गुन्हा दाखल करण्यात आला आहे.

आश्रम संचालक दत्ता गायसमुद्रे यास अटक

या प्रकरणात आश्रम संचालक दत्ता गायसमुद्रे यास अटक करण्यात आली आहे. ही घटना 23 मे ते 15 जुलै 2024 दरम्यान धामणकर नाका परिसरात घडली. असल्याचे उघडकीस आले असून पोलिसांनी भारतीय न्याय संहिता कलम 118(1) , बालन्याय (मुलांच्या काळजी व संरक्षण) अधिनियम 2015 चे कलम 75 अंतर्गत गुन्हा दाखल केला आहे. न्यायालयाने आरोपीला दोन दिवसांची पोलीस कोठडी सुनावली. या संदर्भात अधिक तपास भोईवाडा पोलीस करीत आहे.