Loksabha 2024 : कडेकोट बंदोबस्तात , नव्या एनडीए सरकारचा उद्या शपथ ग्रहण सोहळा …

नवी दिल्ली : राष्ट्रपती द्रौपदी मुर्मू यांनी शुक्रवारी मोदींना सरकार स्थापनेचे निमंत्रण दिल्यानंतर एनडीए संसदीय पक्षाचे नेते म्हणून नरेंद्र मोदी उद्या रविवारी संध्याकाळी सलग तिसऱ्यांदा पंतप्रधानपदाची शपथ घेणार आहेत.  लोकसभा निवडणुकीत भाजपच्या नेतृत्वाखालील एनडीएने २९३ जागा जिंकल्या. तर भाजपने 240 जागा जिंकल्या आहेत. उद्या होणाऱ्या शपथविधी सोहळ्याला उपस्थित राहण्यासाठी  बांगलादेश, श्रीलंका, मालदीव, भूतान, नेपाळ, मॉरिशस आणि सेशेल्सच्या प्रमुख नेत्यांना उपस्थित राहण्यासाठी निमंत्रण देण्यात आले आहे.

याबाबत वृत्तसंस्था पीटीआयने दिलेल्या माहितीनुसार, शपथविधी सोहळ्याच्या पार्श्वभूमीवर  दिल्लीत सुरक्षा व्यवस्था कडक करण्यात आली असून दिल्लीत सर्वत्र १४४ कलम जारी करण्यात आले आहे. यावेळी लावण्यात आलेल्या बंदोबस्तात राष्ट्रपती भवनाच्या सुरक्षेसाठी निमलष्करी दलाच्या पाच कंपन्या, नॅशनल सिक्युरिटी गार्ड कमांडो, ड्रोन आणि ‘स्नायपर्स’ तैनात करण्यात आले आहेत. परदेशी पाहुणे राजधानीतील लीला, ताज, आयटीसी मौर्य, क्लेरिजेस आणि ओबेरॉय हॉटेल्समध्ये राहतील. त्यामुळे हॉटेलांना सुरक्षा कवच प्रदान करण्यात आले आहे.

पोलीस आणि एनएसजी कमांडो तैनात असतील

सोहळ्याच्या दिवशी राष्ट्रपती भवन आणि विविध महत्त्वाच्या ठिकाणी दिल्ली पोलिसांचे SWAT आणि NSG कमांडो तैनात असतील. अधिकाऱ्यांनी सांगितले की, दिल्ली पोलिस अधिकाऱ्यांनी समारंभाच्या पार्श्वभूमीवर सुरक्षा योजना तयार करण्यासाठी पोलिस मुख्यालय आणि नवी दिल्ली जिल्ह्यात अनेक बैठका घेतल्या. राष्ट्रपती भवनात शपथविधी होणार असल्याने संकुलाच्या आत आणि बाहेर त्रिस्तरीय सुरक्षा असेल. दिल्ली पोलिसांचे कर्मचारी ‘बाह्य वर्तुळात’ तैनात केले जातील, त्यानंतर निमलष्करी दले आणि राष्ट्रपती भवनाचे अंतर्गत सुरक्षा कर्मचारी ‘इनर सर्कल’मध्ये तैनात असतील.

G-20 शिखर परिषदेसारखी  असेल व्यवस्था

निमलष्करी दलाच्या पाच कंपन्या आणि दिल्ली सशस्त्र पोलिस (डीएपी) कर्मचाऱ्यांसह सुमारे 2,500 पोलिस कर्मचारी घटनास्थळाभोवती तैनात करण्याची योजना आखण्यात आली आहे, असे अधिकाऱ्याने सांगितले. अन्य एका अधिकाऱ्याने सांगितले की, ‘स्नायपर’ आणि सशस्त्र पोलिस कर्मचारी मान्यवर वापरत असलेल्या मार्गांवर तैनात केले जातील आणि नवी दिल्ली जिल्ह्यातील महत्त्वाच्या ठिकाणी ड्रोन तैनात केले जातील. ते म्हणाले की, गेल्या वर्षी झालेल्या जी-20 शिखर परिषदेच्या वेळी जी व्यवस्था करण्यात आली होती तशीच सुरक्षा व्यवस्था कायम राहण्याची शक्यता आहे.

अधिकाऱ्याने सांगितले की, दिल्लीच्या मध्यभागी जाणारे अनेक रस्ते रविवारी बंद केले जाऊ शकतात किंवा सकाळपासूनच वाहतूक बदलली जाऊ शकते. शनिवारपासून राजधानीच्या सीमेवर चेकिंग वाढवण्यात येणार आहे.

या परदेशी नेत्यांना निमंत्रण

श्रीलंकेचे राष्ट्रपती- रानिल विक्रमसिंघे
मालदीवचे अध्यक्ष- डॉ. मोहम्मद मुइज्जू
सेशेल्सचे उपाध्यक्ष- अहमद अफिक
बांगलादेशच्या पंतप्रधान – शेख हसीना
मॉरिशसचे पंतप्रधान- प्रविंद कुमार जगन्नाथ
नेपाळचे पंतप्रधान – पुष्प कमल दहल ‘प्रचंड’
भूतानचे पंतप्रधान- शेरिंग तोबगे

राष्ट्रपती भवनाच्या माहितीनुसार, “मिळलेल्या विविध पत्रांच्या आधारे, राष्ट्रपतींनी असे निरीक्षण केले की भाजपच्या नेतृत्वाखालील NDA आघाडी नव्याने स्थापन झालेल्या 18 व्या लोकसभेत बहुमत मिळवण्याच्या आणि स्थिर सरकार स्थापन करण्याच्या स्थितीत आहे. भारतीय राज्यघटनेच्या कलम ७५(१) द्वारे प्रदान केलेल्या अधिकारांचा वापर करून, श्री नरेंद्र मोदी यांना भारताचे पंतप्रधान म्हणून नामनिर्देशित करण्यात आले आहे.” राष्ट्रपती पंतप्रधान आणि पंतप्रधान यांची राष्ट्रपती येथे भेट घेतील, असे प्रसिद्धीपत्रकात म्हटले आहे. रविवारी संध्याकाळी 7.15 वाजता भवन येथे केंद्रीय मंत्री परिषदेच्या इतर सदस्यांना पद आणि गोपनीयतेची शपथ दिली जाईल.