MalegaonBombBlastCase : मालेगाव बॉम्ब स्फोटातील २९ वा साक्षीदारही निघाला फितूर …
मालेगाव : महाराष्ट्रातील २००८ मध्ये झालेल्या मालेगाव बॉम्बस्फोट खटल्यातील विशेष एनआयए न्यायालयासमोर साक्ष देणाऱ्या २९ व्या साक्षीदारानेही आपला जबाब फिरवला आहे. हे साक्षीदार एक माजी लष्करी कर्मचारी आहेत. आरोपी लेफ्टनंट कर्नल प्रसाद पुरोहितचा माजी सहकारी असलेल्या या साक्षीदाराने २००८ मध्ये महाराष्ट्र दहशतवाद विरोधी पथकाला (एटीएस) जबाब दिला होता. एटीएसने सुरुवातीला या प्रकरणाचा तपास केला होता.
मंगळवारी विशेष न्यायालयासमोर हजेरी लावताना या साक्षीदाराने सांगितले की, तो पुरोहितला ओळखतो, परंतु दहशतवादविरोधी पथकाला (एटीएस) कोणतेही वक्तव्य देण्यास नकार दिल्याने त्याला फितूर साक्षीदार म्हणून घोषित करण्यात आले. एटीएसला दिलेल्या कथित बयाणात, साक्षीदाराने म्हटले आहे की, पुरोहित गुप्तचर अधिकारी म्हणून काम करत असताना, दुसरा आरोपी सुधाकर चतुर्वेदी हा नाशिकजवळील देवळाली कॅम्पमध्ये वारंवार ये-जा करत असे.
त्यांनी एटीएससमोर साध्वी प्रज्ञा आणि दयानंद पांडे यांच्या विरोधात वक्तव्य केल्याचे सांगितले. मात्र, आता आपण ७५ वर्षांचे असून आपण आधी काय बोललो ते आठवत नाही. या प्रकरणात भाजप नेत्या प्रज्ञा ठाकूर, लेफ्टनंट कर्नल श्रीकांत प्रसाद पुरोहित, सुधाकर द्विवेदी, मेजर रमेश उपाध्याय (निवृत्त) आणि समीर कुलकर्णी यांना आरोपी करण्यात आले होते. सर्व आरोपी जामिनावर बाहेर असून त्यांना राजकीय सूडबुद्धीने फसवण्यात आल्याचे त्यांचे म्हणणे आहे.
या प्रकरणातील अन्य आरोपींमध्ये भोपाळमधील भाजप खासदार प्रज्ञा सिंह ठाकूर यांचा समावेश आहे. २९ सप्टेंबर २००८रोजी मालेगाव येथे झालेल्या स्फोटात सहा जण ठार तर १०० हून अधिक जखमी झाले होते. एका मशिदीबाहेर मोटारसायकलमध्ये पेरलेल्या बॉम्बचा स्फोट झाला. नाशिक जिल्ह्यातील मालेगाव हे तरीही जातीयदृष्ट्या संवेदनशील ठिकाण मानले जाते.