धक्कादायक : बजरंग दलाकडून शाळकरी विद्यार्थ्यांना पिस्तूलं आणि बंदुका वापरण्याचे धडे , भाजप आमदाराच्या शाळेचा पराक्रम

एका इंग्रजी वर्तमानपत्राने दिलेल्या वृत्तानुसार ‘सेव्हन इलेव्हन अकॅडमी’ या शाळेच्या प्रांगणात २५ मे ते १ जून दरम्यान विद्यार्थ्यांसाठी बंदुक प्रशिक्षण शिबीर आयोजित करण्यात आले होते. या शिबीरात सहभागी झालेले अनेक विद्यार्थी अल्पवयीन होते. या प्रशिक्षणाचे फोटो प्रकाश गुप्ता नामक व्यक्तीने फेसबुकवर पोस्ट केले होते. हे फोटो व्हायरल होताच डेमॉक्रेटिक युथ फेडरेशन ऑफ इंडियाच्या कार्यकर्त्यांनी नवघर पोलीस ठाण्यात याविरोधात तक्रार दाखल केली. सेव्हन इलेव्हन अकॅडेमी ही शाळा भाजप आमदार नरेंद्र मेहता यांच्या मालकीची आहे. बजरंग दल या कट्टर हिंदुत्ववादी संघटनेचे कार्यकर्ते शस्त्र प्रशिक्षण देत असल्याचा आरोप तक्रारकर्त्यांनी केला आहे.

दरम्यान या शिबीरासाठी आवश्यक सर्व परवानग्या घेण्यात आल्या आहेत अशी माहिती आयोजकांनी दिली आहे. नरेंद्र मेहतांनी मात्र याबाबत कोणतीही प्रतिक्रिया देणं टाळलं आहे. याप्रकरणी सखोल चौकशी करणार असल्याची माहिती पोलिसांनी दिली आहे.