विद्यार्थ्यांवरील पोलिस कारवाईवर संसदेत चर्चेची मागणी; राहुल गांधींची लोकसभा अध्यक्षांची भेट
काँग्रेसचे खासदार आणि लोकसभेतील विरोधी पक्षनेते राहुल गांधी यांनी सोमवारी विरोधी पक्षांच्या खासदारांसह लोकसभा अध्यक्षांची भेट घेत विद्यार्थ्यांवरील कथित पोलिस कारवाई आणि परीक्षा व्यवस्थेतील संकटावर संसदेत सविस्तर चर्चा घेण्याची मागणी केली.
बैठकीनंतर राहुल गांधी यांनी सोशल मीडियावर प्रतिक्रिया देत म्हटले की, “आमची मागणी अत्यंत स्पष्ट आहे. काल विद्यार्थ्यांवर झालेल्या पोलिसांच्या कथित क्रूर कारवाईवर आणि परीक्षा व्यवस्थेतील संकटाबाबत सरकारच्या उत्तरदायित्वाच्या अभावावर संसदेत सविस्तर चर्चा झाली पाहिजे.”
‘विद्यार्थ्यांना त्यांच्या भविष्याबाबत प्रश्न विचारल्यामुळे मारहाण’
राहुल गांधी यांनी आरोप केला की, “विद्यार्थ्यांनी त्यांच्या भविष्यासंदर्भात योग्य प्रश्न विचारले म्हणून त्यांच्यावर मारहाण करण्यात आली.” त्यांनी या घटनेची संसदेत चर्चा होणे आवश्यक असल्याचे सांगितले.
‘युवकांच्या भविष्यावर चर्चा नसेल तर संसद कशासाठी?’
सरकारवर निशाणा साधताना राहुल गांधी म्हणाले,
“जर भारताच्या युवकांच्या भविष्यावर संसदेत चर्चा होणार नसेल, तर मग संसद कशासाठी आहे?”
त्यांनी पुढे सांगितले की, विद्यार्थ्यांच्या प्रश्नांकडे दुर्लक्ष होऊ दिले जाणार नाही.
‘विद्यार्थ्यांचा आवाज संसदेत आणि रस्त्यावरही घुमेल’
राहुल गांधी यांनी स्पष्ट केले की, विरोधी पक्ष हा मुद्दा दाबून ठेवू देणार नाही. ते म्हणाले,
“विरोधक विद्यार्थ्यांचा आवाज दाबला जाऊ देणार नाहीत. विद्यार्थ्यांचा आवाज रस्त्यावरही आणि संसदेतही बुलंदपणे मांडला जाईल.”
दरम्यान, NEET परीक्षेतील कथित अनियमितता, विद्यार्थ्यांचे आंदोलन आणि संसद मार्चदरम्यान झालेल्या पोलिस कारवाईच्या मुद्द्यावरून संसदेच्या पावसाळी अधिवेशनाच्या पहिल्याच दिवशी विरोधकांनी सरकारला घेरले असून, या विषयावर पुढील काही दिवस संसदेत जोरदार संघर्ष होण्याची शक्यता आहे.
#LiveUpdate | ‘मागण्या मान्य होईपर्यंत आंदोलन सुरूच राहणार’