‘लष्कराने लक्ष्य, वेळ आणि पद्धत ठरवावी’, तिन्ही लष्कर प्रमुखांसोबतच्या उच्चस्तरीय बैठकीत पंतप्रधान मोदींनी दिली मोकळीक
नवी दिल्ली : पहलगाम दहशतवादी हल्ल्यानंतर, संपूर्ण देश दहशतवाद्यांचा आका असलेल्या पाकिस्तानविरुद्ध कारवाईची मागणी करत आहे. दरम्यान, पंतप्रधान नरेंद्र मोदी यांनी संरक्षण मंत्री राजनाथ सिंह आणि तिन्ही सैन्याच्या प्रमुखांसोबत उच्चस्तरीय बैठक घेतली. यामध्ये सीडीएस अनिल चौहान आणि राष्ट्रीय सुरक्षा सल्लागार अजित डोभाल हे देखील उपस्थित होते.
सूत्रांनी दिलेल्या माहितीनुसार, सुमारे दीड तास चाललेल्या या बैठकीत अनेक महत्त्वाचे निर्णय घेण्यात आले. पंतप्रधान मोदींनी लष्कराला पूर्ण स्वातंत्र्य दिले आहे. ते म्हणाले की, दहशतवादाला योग्य उत्तर देणे हा आपला दृढ राष्ट्रीय संकल्प आहे. त्यांनी भारतीय सशस्त्र दलांच्या व्यावसायिक क्षमतेवर पूर्ण विश्वास व्यक्त केला. “पंतप्रधान मोदी म्हणाले की, सशस्त्र दलांना आपल्या प्रत्युत्तराची पद्धत, त्याचे लक्ष्य आणि त्याची वेळ याबाबत ऑपरेशनल निर्णय घेण्याचे स्वातंत्र्य आहे.”
पंतप्रधान म्हणाले होते की दहशतवाद्यांना कठोर शिक्षा दिली जाईल…
२२ एप्रिल रोजी पहलगाममधील लोकप्रिय पर्यटन स्थळ बैसरन येथे झालेल्या दहशतवादी हल्ल्यात २६ जणांचा मृत्यू झाला होता, ज्यात बहुतेक पर्यटक होते. पंतप्रधान नरेंद्र मोदी यांनी या हल्ल्यात सहभागी असलेल्या दहशतवाद्यांचा आणि त्यांच्या मालकांचा पृथ्वीच्या शेवटापर्यंत पाठलाग करण्याचे आणि त्यांना त्यांच्या कल्पनेपलीकडे असलेली कठोर शिक्षा देण्याचे आवाहन केले आहे.
पहलगाम दहशतवाद्यांना जबाबदार धरले जाईल
पंतप्रधानांच्या कडक वक्तव्यांमुळे आणि राष्ट्रीय सुरक्षेच्या मुद्द्यांवर त्यांच्या सरकारच्या कठोर भूमिकेमुळे भारताकडून प्रत्युत्तराची अपेक्षा वाढली आहे. पहलगाम हल्ल्यानंतर, भारताने पाकिस्तानविरुद्ध अनेक पावले उचलली आहेत, ज्यात शेजारील देशासोबतचा सिंधू पाणी करार निलंबित करणे समाविष्ट आहे.
पहलगाम हल्ल्यानंतर, लष्करी दलांना हाय अलर्टवर ठेवण्यात आले आहे, नियंत्रण रेषा आणि आंतरराष्ट्रीय सीमेवरील विशिष्ट तुकड्यांना ऑपरेशनल रेडीनेस मोडमध्ये ठेवण्यात आले आहे. पाकव्याप्त काश्मीर (पीओके) मधील दहशतवादी लाँचपॅडवर पाळत ठेवणारे ड्रोन, उपग्रह प्रतिमा आणि इलेक्ट्रॉनिक इंटरसेप्ट बारकाईने लक्ष ठेवून आहेत.