ज्येष्ठ मार्क्सवादी नेते गुरुदास दासगुप्ता यांचे निधन
भारतीय कम्युनिस्ट पार्टीचे (भाकप) उपमहासचिव ज्येष्ठ मार्क्सवादी नेते गुरुदास दासगुप्ता यांचं काल पहाटे ६ वाजता कोलकाता येथे निधन झालं. ते ८३ वर्षाचे होते. त्यांच्यामागे पत्नी आणि मुलगी असा परिवार आहे. ते होते. त्यांनी लोकसभा आणि राज्यसभेचे सदस्य म्हणून २५ वर्ष काम पाहिलं. त्यांच्या निधनावर राष्ट्रपती रामनाथ कोविंद, पंतप्रधान नरेंद्र मोदी आणि पश्चिम बंगालच्या मुख्यमंत्री ममता बॅनर्जी यांनी दु:ख व्यक्त केलं आहे. गुरुदास दासगुप्ता गेल्या वर्षभरापासून कर्करोग आणि हृदयरोगाने त्रस्त होते. गेल्या काही दिवसांपासून त्यांचा आजार बळावला होता. आज पहाटे सहा वाजता त्यांची राहत्या घरीच प्राणज्योत मालवली.
उत्कृष्ट संसदपटू म्हणून त्यांनी राज्यसभा आणि लोकसभा गाजवली होती. ते तीन वेळा राज्यसभेचे तर दोनवेळा लोकसभेचे सदस्य होते. १९८५मध्ये ते पहिल्यांदा राज्यसभेवर निवडून गेले होते. २००१मध्ये त्यांना ऑल इंडिया ट्रेड यूनियन काँग्रेसचे महासचिव म्हणून नियुक्त करण्यात आले. स्पष्ट वक्ते म्हणून प्रसिद्ध असलेल्या दासगुप्ता यांनी २०१२-२०१३मध्ये मनमोहन सिंग सरकारने मांडलेल्या अर्थसंकल्पावर तिखट प्रतिक्रिया व्यक्त केली होती. केंद्रीय अर्थमंत्री म्हणून प्रणव मुखर्जी यांची काहीच गरज नव्हती. असा अर्थसंकल्प कोणताही क्लर्क तयार करू शकतो, अशी टीका त्यांनी मनमोहन सिंग सरकारवर केली होती. दरम्यान, वयपरत्वे आजार बळावल्याने त्यांनी पक्षातील सर्व पदांचा राजीनामा दिला होता. मात्र भाकपच्या राष्ट्रीय कार्यकारिणी परिषदेचे ते शेवटपर्यंत सदस्य होते.
राष्ट्रपती रामनाथ कोविंद यांनी दासगुप्ता यांच्या निधनावर तीव्र शोक व्यक्त केला आहे. सीपीआयचे ज्येष्ठ नेते, ट्रेड युनियनिस्ट आणि सभागृहातील अभ्यासू संसदपटू गुरुदास दासगुप्ता यांचं निधन झाल्याचं ऐकून दु:ख झालं. त्यांच्या निधनाने पश्चिम बंगालचीच नव्हे तर संपूर्ण भारताची अपरिमित हानी झाली आहे, अशा शब्दात कोविंद यांनी शोक व्यक्त केला आहे. तर दासगुप्ता हे विचाराने पक्के आणि स्पष्टवक्ते होते. संसदेतील एक मजबूत आवाज म्हणून त्यांची ख्याती होती. त्यांची संसदेतील भाषणं उत्सुकतेने ऐकली जात. एक चांगला संसदपटू गमावल्याने प्रचंड दु:ख होत असल्याचं पंतप्रधान नरेंद्र मोदी यांनी त्यांच्या शोकसंदेशात म्हटलं आहे.