CrimeNewsUpdate : व्वा रे पठ्ठे !! त्यांनी हुबेहूब स्टेट बँकेची बनावट शाखा सुरू केली खरी पण शेवटी बिंग फुटलेच !!

नवी दिल्ली : छत्तीसगडमध्ये हुबेहूब स्टेट बँक ऑफ इंडिया (SBI) ची बनावट शाखा उघडण्याचा पराक्रम उघडकीस आला आहे . विशेष म्हणजे या घोटाळ्यामध्ये कर्मचाऱ्यांचीही बेकायदेशीर भरती करून त्यांना बनावट नियुक्ती पत्रे देऊन त्यांच्यासाठी बनावट प्रशिक्षण सत्रेही आयोजित करण्यात येत होती. तसेच बेरोजगार व्यक्तींची भरती करून आणि स्थानिक ग्रामस्थांची फसवणूक करण्यासाठी विस्तृत सेटअप तयार करण्यात आले होते. एनडीटीव्हीने यासंदर्भातील सविस्तर वृत्त दिले आहे.

अधिक माहितीनुसार छत्तीसगडची राजधानी असलेल्या रायपूरपासून सुमारे २५० किलोमीटर अंतरावर, सक्ती जिल्ह्यातील छपोरा नावाच्या शांत गावात SBI बँकेची ही बनावट शाखा तयार करण्यात आली. फक्त १० दिवसांपूर्वी उघडलेल्या ही शाखा खरोखरची बँक वाटावी याकरता एकदम चपखल बँकेची प्रतिकृती तयार करण्यात आली होती. नवीन फर्निचर, व्यावसायिक कागदपत्रे आणि कार्यरत बँक काउंटर या बँकेत होते. तर, अनेक गावकरी खाती उघडण्यासाठी आणि व्यवहार करण्यासाठी या बँकेला भेट देऊ लागले. नव्याने नियुक्त झालेल्या कर्मचाऱ्यांनाही नामांकित बँकेत नोकरी मिळाल्याने आनंद झाला होता.
परंतु, बाजूच्या डाबरा शाखेच्या व्यवस्थापकाला या शाखेविषयी संशय आला. त्यामुळे २७ सप्टेंबर रोजी चौकशीसाठी वरिष्ठ पोलीस आणि एसबीआय अधिकारी उपस्थित झाले. त्यांनी केलेल्या चौकशीतून ही शाखा पूर्णतः बनावट असल्याचे उघड झाले .

या विषयी माहिती देताना वरिष्ठ पोलीस अधिकारी राजेश पटेल म्हणाले की , “डाबरा शाखेच्या व्यवस्थापकाने छापोरा येथे कार्यरत असलेल्या एका बनावट बँकेच्या संशयाबद्दल आम्हाला माहिती दिली. तपासाअंती, सदर बँक बनावट असल्याचे स्पष्ट झाले. या बँकेत मॅनेजर, मार्केटिंग ऑफिसर, कॉम्प्युटर ऑपरेटर, कॅशियर आदी पदेही बनावट ऑफर लेटर देऊनभरण्यात आली आणि ही पदे भरतानाही मोठा भ्रष्टाचार केला. २ ते ६ लाखांपर्यंतची लाच या नोकऱ्यांसाठी घेण्यात आली. इतकेच नव्हे तर या नियुक्त झालेल्या कर्मचाऱ्यांना प्रशिक्षणही देण्यात आले .

असा उघडकीस आला बनाव ….

या बनावट शाखेबद्दल छपोरा येथील स्थानिक गावकरी अजय कुमार अग्रवाल यांच्या जगरुकतेमुळे हा प्रकार उघडकीस आला .त्याने एसबीआय किऑस्कसाठी अर्ज केला होता. गावात एका रात्रीत एका मोठ्या बँकेची शाखा उभी राहते, यावरून त्याला सुरुवातीला संशय आला होता. कारण, त्यांच्या गावाची अधिकृत बँक डाबरा येथे होती. कोणत्याही जाहिरात किंवा नोटीशीशिवाय अशी बँक उभी राहू शकते यावर त्याचा विश्वास बसत नव्हता. त्यामुळे त्याने या शाखेची चौकशी केली. परंतु, बँकेच्या कर्मचाऱ्यांनी योग्य उत्तरे दिली नाहीत. तसेच, शाखेच्या साईनबोर्डवर शाखा क्रमांकही देण्यात आला नव्हता. अजयचा संशय आणि त्यानंतर डबरा शाखेच्या व्यवस्थापकाला दिलेल्या अहवालामुळे या गुंतागुंतीच्या घोटाळ्याचा उलगडा झाला. या बनावट शाखेच्या व्यवस्थापक रेखा साहू, मंदिर दास आणि पंकज यांच्यासह चार लोकांची ओळख पटली आहे.

अनेक बेरोजगरांची फसवणूक

विशेष म्हणजे या शाखेसाठी गावातील रहिवासी तोषचंद्र यांच्या कॉम्प्लेक्समध्ये 7 हजार रुपये भाडे करावर एसबीआयची ही बनावट शाखा सुरू करण्यात आली होती. फसवणूक करणाऱ्याने बँक कायदेशीर दिसण्यासाठी योग्य फर्निचर आणि चिन्हांची व्यवस्था केली होती. कर्मचारी भरतीसाठी कोरबा, बालोद, कबीरधाम आणि शक्तीसह विविध जिल्ह्यांतील बेरोजगार व्यक्तींना लक्ष्य करण्यात आले होते.

या शाखेत नियुक्त बनावट कर्मचारी ज्योती यादव यांनी दावा केला की, मी कर्मचारी म्हणून काम करते. मी माझी कागदपत्रे सादर केली, बायोमेट्रिक्स पूर्ण केले आणि त्यांनी मला सांगितले की माझी नियुक्ती निश्चित झाली आहे. मला तीस हजार पंगरची ऑफर देण्यात आली होती. दुसरी पीडित संगीता कंवर म्हणाली, “माझ्याकडे ५ लाख रुपये मागितले गेले होते, पण मी त्यांना सांगितले की मी इतके पैसे देऊ शकत नाही. आम्ही शेवटी २.५ लाख रुपयांवर सेटलमेंट केले. मला ३० ते ३५ हजार रुपये पगार देण्याचे वचन देण्यात आले होते.”

दरम्यान आपल्या गावात स्टेट बँकेची नवीन शाखा झाल्याने अनेक गावकरी उत्साहित होते आणि बँक पूर्णपणे कार्यान्वित झाल्यावर त्यांनी कर्ज घेण्याचा विचारही केला होता”, असे योगेश साहू म्हणाले. “खोटी बँक चालू राहिली असती तर अनेकांनी पैसे जमा केले असते आणि करोडोंची फसवणूक झाली असती”, असे गावकरी राम कुमार चंद्रा म्हणाले. या प्रकारामुळे बेरोजगार पीडितांना आता केवळ आर्थिक नुकसानच नाही तर कायदेशीर अडचणींचाही सामना करावा लागत आहे.