IndiaNewsUpdate : लालकृष्ण अडवाणी यांची प्रकृती खालावली , दिल्लीतील एम्स रुग्णालयात दाखल

नवी दिल्ली : माजी उपपंतप्रधान आणि भारतीय जनता पार्टीचे ज्येष्ठ नेते लालकृष्ण अडवाणी यांची प्रकृती खालावली असल्याचे वृत्त असून त्यांना दिल्लीतील एम्स रुग्णालयात दाखल करण्यात आले आहे. मिडिया रिपोर्ट्सनुसार, वयोमानानुसार त्यांना प्रकृतीच्या काही तक्रारी जाणवत असल्यानं त्यांना रुग्णालयात दाखल करण्यात आले आहे. लालकृष्ण अडवाणी यांना एम्सच्या जेरियाट्रिक विभागाच्या डॉक्टरांच्या निरीक्षणाखाली ठेवण्यात आल्याची माहिती सूत्रांनी दिली आहे. 

लालकृष्ण अडवाणी यांच्या प्रकृतीबाबतचे  मेडिकल बुलेटिन एम्सचे डॉक्टर आणि वैद्यकीय तज्ज्ञ लवकरच जारी करू शकतात. महत्त्वाची बाब म्हणजे, याच वर्षी भाजपचे ज्येष्ठ नेते लालकृष्ण अडवाणी यांना  भारतरत्न प्रदान केला होता. त्यांच्या प्रकृतीमुळे राष्ट्रपती द्रौपदी मुर्मू यांनी  त्यांच्या निवासस्थानी जाऊन भारतरत्न देऊन सन्मानित केले  होते. यावेळी पंतप्रधान नरेंद्र मोदी, उपराष्ट्रपती जगदीप धनखड आणि माजी उपराष्ट्रपती एम व्यंकय्या नायडू उपस्थित होते.

यापूर्वी 2015 मध्ये त्यांना  पद्मविभूषण पुरस्कारानेही सन्मानित करण्यात आले होते . लालकृष्ण अडवाणी हे 2002 ते 2004 पर्यंत भारताचे ,सातवे उपपंतप्रधान होते. ते भाजपच्या  सह-संस्थापकांपैकी एक आहेत आणि राष्ट्रीय स्वयंसेवक संघाचे सदस्य आहेत. लालकृष्ण अडवाणी 1998 ते 2004 या काळात सर्वाधिक काळ गृहमंत्री होते. ते लोकसभेत सर्वाधिक काळ विरोधी पक्षाचे नेते आहेत. अयोध्या राम मंदिर आंदोलनात त्यांनी प्रमुख नेत्याची भूमिका बजावली होती. अडवाणींनी 25 सप्टेंबर 1990 रोजी गुजरातमधील सोमनाथ येथून पहिली राम रथयात्रा सुरू केली, जी अयोध्येत संपली.

दरम्यान, लालकृष्ण अडवाणी यांचा जन्म 8 नोव्हेंबर 1927 रोजी सध्याच्या पाकिस्तानातील कराची येथे झाला. मी 12 सप्टेंबर 1947 रोजी पाकिस्तान सोडल्याचे  त्यांनी एका मुलाखतीदरम्यान सांगितले होते . त्याच्या आगमनानंतर एक महिन्याने  त्यांचे  कुटुंब भारतात आले . लालकृष्ण अडवाणी यांच्या कुटुंबात त्यांच्या कन्या प्रतिभा अडवाणी आणि त्यांचे चिरंजीव जयंत अडवाणी आहे.