MaharashtraNewsUpdate : महाराष्ट्र राज्य लोकसेवा आयोगाची परीक्षा लांबणीवर , मुख्यमंत्री उद्धव ठाकरे

उद्या रविवारी ११ तारखेला होत असलेली महाराष्ट्र राज्य लोकसेवा आयोगाची परीक्षा एमपीएससीने  पुढे ढकलण्यात आली असल्याची माहिती मुख्यमंत्री उद्धव ठाकरे यांनी दिली आहे.  मराठा आरक्षणाचा निर्णय होत नाही तोपर्यंत एमपीएससी परीक्षा घेतली जाऊ नये, अशी मागणी विविध संघटना, नेत्यांकडून होत होती. या पार्श्वभूमीवर ही परीक्षा लांबणीवर टाकण्यात आली आहे. मुख्यमंत्री उद्धव ठाकरे यांनी ही परीक्षा अनिश्चित काळासाठी पुढे ढकलण्यात येत असल्याची घोषणा केली. राज्याच्या मंत्रिमंडळ बैठकीत हा निर्णय घेण्यात आला असल्याचे त्यांनी सांगितले.  मुख्यमंत्री उद्धव ठाकरे पुढे म्हणाले, ‘करोना आणि लॉकडाऊनचं संकट होतं, अजूनही ते दूर झालेलं नाही. करोनाकाळात अभ्यासिका बंद होत्या, अनेक विद्यार्थ्यांची ही मागणी होती की ही परीक्षा पुढे ढकलली जावी, त्यामुळे परीक्षा पुढे ढकलली, ही परीक्षा आता कधी होणार त्याबाबतची तारीख लवकरच जाहीर करण्यात येईल.’

दरम्यान मराठा क्रांती मोर्चासह अनेक विद्यार्थी संघटनांनी राज्य सेवा पूर्व परीक्षा पुढे ढकलण्याची मागणी लावून धरली होती. खासदार संभाजी राजे यांनी ही परीक्षा रद्द न केल्यास तीव्र आंदोलन छेडण्याचा इशारा राज्य सरकारला दिला होता. एकूण सुमारे २ लाख ६० हजार विद्यार्थ्यांनी या परीक्षेसाठी नोंदणी केली होती. मराठा आंदोलनकर्त्यांनी घेतलेल्या आक्रमक भूमिकेमुळे राज्य सरकारवर ही परीक्षा न घेण्यासाठी दबाव निर्माण झाला होता. या सर्व पार्श्वभूमीवर राज्य सरकारच्या प्रमुख नेत्यांची आज बैठक पार पडली. त्यात ही परीक्षा तूर्त लांबणीवर टाकण्याचा निर्णय घेण्यात आला. मराठा आरक्षण प्रकरणी वेळ पडल्यास आपण तलवारही उपसू शकतो असा इशारा खासदार संभाजीराजेंनी दिला होता. खासदार उदयनराजे यांनीही आज सोशल मीडियावर एक पोस्ट लिहून एमपीएससी परीक्षा पुढे ढकलण्याची मागणी केली होती. दरम्यान, राष्ट्रवादी काँग्रेसचे ज्येष्ठ नेते आणि माजी उपमुख्यमंत्री छगन भुजबळ यांनी ही परीक्षा पुढे ढकलण्यात यायला नको अशी भूमिका मांडली होती. यापूर्वी कोविड -१९ महामारीच्या पार्श्वभूमीवर ही परीक्षा लांबणीवर टाकण्यात आली होती. त्यानंतर ११ ऑक्टोबर रोजी ही परीक्षा आयोजित करण्यात आली होती. ती आता अनिश्चित काळासाठी पुढे ढकलण्यात आली आहे.