MumbaiNewsUpdate : भांडुपमधील खून प्रकरणात ९ जणांना कोर्टाने सुनावली जन्मठेपेची शीक्षा
मुंबईतील भांडुपमध्ये क्रिकेट खेळत असताना पाळीव कुत्र्याने चेंडू तोंडात पकडला आणि तो सोडला नाही, या कारणातून कुत्र्याचे मालक अनिल पांडे यांच्यासोबत वाद झाल्यानंतर दुसऱ्या दिवशी त्यांच्या घरात घुसून तलवार व चाकूने वार करत त्यांची हत्या करणाऱ्या नऊ तरुणांना सत्र न्यायालयाने जन्मठेपेची शिक्षा ठोठावली. भांडुपमध्ये पाच वर्षांपूर्वी ही घटना घडली होती. न्या. किशोर जैस्वाल यांनी आरोपी नऊ तरुणांना नुकतीच शिक्षा सुनावली. समीर चव्हाण (२१), गौतम घाडगे (२५), सूरज गवस (२६), समीर कदम (२६), रवींद्र वनारे (२२), सौरभ खोपडे (१८), विशाल पराड (२१), सचिन हातपळे (२३) व विश्वदीप नाईक (२५) अशी या दोषींची नावे आहेत. सरकारी पक्षाने त्यांच्याव्यतिरिक्त २४ जणांची साक्ष न्यायालयात नोंदवली, असे सरकारी वकील इक्बाल सोलकर यांनी सांगितले.
पाच वर्षांपूर्वी म्हणजेच २०१५ साली ही घटना घडली. अनिल यांची पत्नी प्रिया (वय ३२) ही या प्रकरणातील मुख्य साक्षीदार आहे. टोळीनं हल्ला केला त्यावेळी त्या घरात होत्या. त्यांनी आपल्या दोन लहान मुलींसह पळ काढून स्वतःचा आणि मुलींचा जीव वाचवला होता. कोर्टात त्यांनी आरोपींना ओळखले. अनिलवर हल्लेखोरांनी तलवार, चाकू आणि बॅटने वार केले होते. या घटनेची माहिती मिळताच पोलीस घटनास्थळी आले होते. त्यांनी अनिलला रुग्णालयात नेले. मात्र, तिथे त्याला मृत घोषित केले. अनिलच्या शरीरावर १७ ठिकाणी खोलवर जखमा झाल्या होत्या. पोलिसांनी आरोपींना अटक केली होती.
या प्रकरणी माहिती देताना प्रिया यांनी सांगितलं की, ६ जून २०१५ रोजी अनिल हे सकाळी साडेदहाच्या सुमारास पाळीव कुत्र्याला सोबत घेऊन घराबाहेर वॉकसाठी पडले होते. त्यावेळी अनिलचे मित्र योगेश म्हणाला की, आरोपी सौरभसह काही तरूण क्रिकेट खेळत असताना कुत्र्याने त्यांचा चेंडू तोंडात पकडला. सौरभने तो चेंडू परत मिळवण्याचा प्रयत्न केला. पण कुत्र्याने तो चेंडू सोडला नाही. यावरून अनिल आणि त्या मुलांमध्ये वाद झाला. रात्री साडेनऊच्या सुमारास अनिल आणि काही तरुणांमध्ये घराजवळ वाद झाला होता. साधारण साडेदहाच्या सुमारास अनिलच्या बहिणीने आणि काही मित्रांनी त्याला घरी आणले. तो नशेत होता आणि तो सौरभच्या नावाने शिवीगाळ करत होता. सौरभशी भांडण झाले असून तो कुत्र्याचे पाय तोडू असा म्हणत असल्याचे अनिल सांगत होता. मध्यरात्री दोन वाजता आरोपीसह दहा ते बारा जण शस्त्रांसह घराकडे आले. त्यांनी आधी घरावर दगडफेक केली. त्यानंतर त्यांनी अनिलवर हल्ला केला. तसेच त्यांनी अनिलला भोसकले. मी हस्तक्षेप करून सोडवण्याचा प्रयत्न केला असता मला ढकलून दिले. अनिल हा बेशुद्ध झाला. आरोपींनी मला धमकावले. शेजारीही भीतीने त्यांना वाचवण्यासाठी धावून आले नाही, असे तिने सांगितले.