जावयाच्या विरोधात सासूची बलात्काराची फिर्याद , पत्नीसमोर कबुली देऊन आरोपी झाला पसार ….
समाजात मातेसमान मानल्या जाणाऱ्या सासूवरच जावयाच्या विरोधात बलात्काराची तक्रार नोंदविण्याची वेळ आली आहे. महिन्याभरापूर्वी हि बलात्काराची घटना घडल्याचे पीडित महिलेने शुक्रवारी संध्याकाळी हैदराबादच्या पंजागुट्टा पोलीस स्थानकात दिलेल्या तक्रारीत म्हटले आहे. टाइम्स ऑफ इंडियाने हे वृत्त दिले आहे. आरोपी एका खासगी कंपनीत चांगल्या हुद्दयावर नोकरीला आहे.
पोलिसात दिलेल्या तक्रारीत पीडित महिलेने तिच्याबरोबर नेमके काय घडले ते नमूद केले आहे. १३ नोव्हेंबरला झोपेमध्ये असताना आरोपीने तिच्यावर बलात्कार केला अशी माहिती पोलिसांनी दिली. “मी झोपेमध्ये असताना आरोपी माझ्या खोलीमध्ये आला व त्याने लैंगिक जबरदस्ती केली. मी आरडाओरडा करुन इतरांना सतर्क करण्याचा प्रयत्न केला. पण त्याने माझे तोंड बंद करुन माझ्यावर बलात्कार केला” असे महिलेने तिच्या तक्रारीत म्हटले आहे.
“गुन्हा घडल्यानंतर महिन्याभराने महिलेने तक्रार नोंदवली. आम्ही तात्काळ तक्रार नोंदवून घेतली. आम्ही सर्व बाजूंनी या गुन्ह्याचा तपास करत आहोत सध्या आरोपी फारर आहे” असे या प्रकरणातील तपास अधिकाऱ्याने सांगितले. “गुन्हा घडला त्यादिवशी रात्री मी झोपेच्या गोळया घेऊन झोपी गेले. माझी मुलगी कामावर गेली होती. आरोपी दुसऱ्या खोलीत दारु पीत बसला होता” असे पीडित महिलेने तक्रारीत म्हटले आहे. मुलगी घरी आली तेव्हा तिला आई रडत असल्याचे दिसले. तिचा नवरा घरामध्ये नव्हता. महिलेने तिच्या मुलीला घडलेला सर्व प्रकार सांगितला. मुलीने लगेच तिच्या नवऱ्याला घरी बोलावून घेतले व जाब विचारला. त्यानंतर आरोपीने गुन्ह्याची कबुली देत तो घरातून निघून गेला. मी लवकरच तुला घटस्फोट देऊन पोटगी देईन असे त्यावेळी आरोपीने म्हटले होते.