संगमनेर शहरात चोरांनी फोडली एटीएम , १७ लाखांवर मारला डल्ला !!
संगमनेर शहरातून जाणाऱ्या नाशिक-पुणे मार्गावरील एटीएम सेंटर फोडून चोरट्यांनी सुमारे १७ लाखांची रोकड लांबविली. गुंजाळवाडी शिवारातील बँक ऑफ महाराष्ट्रचे एटीएम मशीन शुक्रवारी (२२ जून ) रात्री दोनच्या सुमारास अज्ञात चोरट्यांनी फोडले. या चोरीमुळे एटीएमची सुरक्षा ऐरणीवर आली आहे. संगमनेर महाविद्यालयाजवळ गुंजाळवाडी शिवारामध्ये पुणे-नाशिक मार्गावर बॅंक ऑफ महाराष्ट्रची शाखा आहे. या शाखेत एटीएमदेखील उपलब्ध आहे. शुक्रवारी मध्यरात्री दोघा अज्ञात चोरट्यांनी या एटीएम सेंटरमध्ये प्रवेश करत ते फोडले. एरव्ही दिवसभर वर्दळीचे असलेल्या या एटीएमकडे रात्रीच्यावेळी फारसे कोणी फिरकत नाही. चोरट्यांनी महामार्गावरील हे एटीएम लक्ष्य केले. महामार्गावर वर्दळदेखील फारशी नसल्याने एटीएम फोडण्यासाठी त्यांना पुरेसा वेळदेखील मिळाला. फोडलेले एटीएम वायररोपच्या साहाय्याने सेंटर बाहेर ओढल्याचे व ते गाडीत टाकून नेल्याचा पोलिसांचा अंदाज आहे.
बाहेरच्या पटांगणामध्ये एटीएममध्ये स्लिपांसाठी वापरल्या जाणारा कागदी रोल, आणि एटीएमचा काही भाग पोलिसांना आढळून आला. तसेच तेथे एका चारचाकी वाहनाच्या टायरच्या खुणादेखील आढळल्याने याच वाहनातून हे मशीन चोरट्यांनी लंपास केले असल्याचा अंदाज आहे. पोलिसांनी या एटीएममधील सीसीटीव्ही फुटेज तपासासाठी ताब्यात घेतले असून त्यात संशयितांच्या हालचाली कैद झाल्या आहेत. घटनेची माहिती मिळताच संगमनेरचे पोलिस उपअधीक्षक अशोक थोरात, शहर पोलीस ठाण्याचे निरीक्षक अभय परमार आणि पोलीस घटनास्थळी दाखल झाले. श्वानपथकाच्या मदतीनेदेखील चोरीचा तपास लावण्याचा प्रयत्न करण्यात आला. मात्र चोरटे वाहनाने पसार झाले असल्याने त्यांचा माग लागला नाही.
दरम्यान शनिवारी दुपारी सिन्नर (नाशिक) जवळच्या माळवाडी येथे या एटीएमचा काही भाग पोलिसांना आढळल्याची माहिती मिळाली. तसेच घटनेच्या काही वेळापूर्वी नाशिक-पुणे मार्गावरील आंबीखालसा शिवारातून एका बोलेरोची चोरी झाल्याचे पुढे आले आहे. चोरट्यांनी कदाचित हेच वाहन गुन्ह्यासाठी वापरले असावे असा संशय आहे.