अभिनेता करण ओबेरॉयवर बलात्काराचा आरोप करणारी महिला अटकेत

अभिनेता करण ओबेरॉयवर बलात्काराचा आरोप करणाऱ्या ज्योतिषी महिलेला अटक करण्यात आली आहे. ओशिवरा पोलिसांनी आज ही कारवाई केली. सदर महिलेने २५ मे रोजी स्वत:वरच हल्ला करवून घेतला होता व नंतर खोटी तक्रार केली. अभिनेता करण ओबेरॉयवर बलात्काराचा आरोप करणाऱ्या ज्योतिषी महिलेला अटक करण्यात आली आहे. ओशिवरा पोलिसांनी आज ही कारवाई केली. सदर महिलेने २५ मे रोजी स्वत:वरच हल्ला करवून घेतला होता व नंतर खोटी तक्रार केली होती. याबाबत पुरावे हाती लागल्यानंतर पोलिसांनी अटकेची कारवाई केली.

संबंधित महिला मॉर्निंग वॉकला गेली असता बाइकवरून आलेल्या दोन जणांनी तिच्यावर पेपर कटरने हल्ला केला होता व अॅसिड फेकण्याची धमकी देत एक चिट्ठी फेकून ते पसार झाले होते. ‘तक्रार मागे घे’ असे या चिठ्ठीत लिहिण्यात आले होते. दरम्यान, पोलिसांनी सीसीटीव्हीच्या आधारे दोन दिवसांत हल्लेखोरांचा शोध लावत चार जणांना याप्रकरणी अटक केली. या चौघांची कसून चौकशी केली असता त्यापैकी एकजण संबंधित महिलेच्या वकिलाचा चुलत भाऊ असल्याचे स्पष्ट झाले. हा योजनाबद्ध हल्ला होता. यासाठी आम्हाला महिलेच्या वकिलाकडून १० हजार रुपये मिळाले होते, अशी धक्कादायक कबुलीच या हल्लेखोरांनी दिली. या माहितीच्या आधारे पोलिसांनी सदर महिलेला अटक केली आहे.

दरम्यान, अटकेआधी सदर महिलेने आपल्यावरील आरोप खोटे असल्याचा दावा केला. पोलीस आयुक्त आणि ओशिवरा पोलिसांना मी याबाबत कळवले आहे. मी निर्दोष आहे. माझ्या आधीच्या वकिलाने मला फसवले आहे, असे ही महिला म्हणाली.