ICI World Cup 2019 : इंग्लंडचे आव्हान बांगला देशाला झेपले नाही , १६० धावांनी दारुण पराभव
विश्वचषक स्पर्धेच्या सामन्यात इंग्लंडने बांगलादेशवर १०६ धावांनी दणदणीत विजय मिळवला आहे. जेसन रॉयने केलेल्या दीड शतकी खेळीच्या जोरावर इंग्लंडने दिलेल्या ३८७ धावांचा पाठलाग करताना बांगलादेशचा संघ २८० धावांत गारद झाला. या विजयासह इंग्लंडच्या खात्यात ४ गुण जमा झाले असून, इंग्लंड गुणतालिकेत २ क्रमांकावर इंग्लंडने दिलेल्या बड्या आव्हानाचा पाठलाग करण्यासाठी मैदानात उतरलेल्या बांगलादेश संघाची सुरुवात अत्यंत खराब झाली. सलामीवीर सौम्य सरकार अवघ्या २ धावांवर त्रिफळाचीत झाला. त्यानंतर तमिम इक्बाल आणि शाकीब अल हसन यांनी संयमित फलंदाजी करत धावफलक हलता ठेवला. मात्र, मार्क वूडने तमिम इक्बालला (१९) तंबूत धाडले.
मुशफिकूर रहीम आणि शाकीब अल हसन यांनी उत्तम फलंदाजी करत तिसऱ्या गड्यासाठी शतकी भागिदारी रचली. परंतु, फटका मारण्याच्या नादात मुशफिकूर रहीम (४४) बाद झाला. यानंतर मैदानात उतरलेल्या मोहम्मद मिथूनला भोपळाही फोडता आला नाही. एकाबाजूने फटकेबाजी सुरू ठेवत शाकीबने आपले शतक पूर्ण केले. त्याला अन्य फलंदाजांची चांगली साथ मिळाली नाही. शाकीब १२१ धावा काढून बाद झाला. यानंतर बांगलादेशचे फलंदाज नियमित अंतराने बाद होत राहिले. अखेर ४८.५ षटकांत बांगलादेशचा डाव २८० धावांवर संपुष्टात आला. इंग्लंडकडून बेन स्टोक्स आणि जोफ्रा आर्चरने प्रत्येकी ३, मार्क वूडने २, तर लियाम प्लंकेट व आदिल रशीद यांनी १-१ गडी टिपला.
दरम्यान, सलामीवीरांच्या उत्तम कामगिरीच्या जोरावर इंग्लंड संघाने पहिल्या गड्यासाठी शतकी भागिदारी रचली. सलामीवीर जॉनी बेअरस्ट्रो ५१ धावांवर बाद झाला. यानंतर आलेल्या जो रूटने सलामीवीर जेसन रॉयला चांगली साथ दिली. मात्र, मोहम्मद सैफुद्दीनने जो रूटचा (२१) त्रिफळा उडवत त्याला माघारी धाडले. दुसऱ्या बाजूने फटकेबाजी करत जेसन रॉयने खणखणीत दीडशतकी खेळी केली. तो १५३ धावांवर बाद झाला. रॉयच्या या खेळीत १४ चौकार आणि ५ षटकांचा समावेश होता. यानंतर मैदानात उतरलेल्या जॉस बटलरने ६४ धावांचे महत्त्वपूर्ण योगदान दिले. जेसन रॉय, जॉनी बेअरस्ट्रो आणि जॉस बटलर यांच्या खेळीच्या जोरावर इंग्लंडने निर्धारित ५० षटकांत ६ गड्यांच्या मोबदल्यात ३८६ धावा केल्या. बांगलादेशकडून मेहदी हसन व मोहम्मद सैफुद्दीन यांनी प्रत्येकी २, तर मशरफे मोर्तझा आणि मुस्तफिझूर रेहमान यांनी प्रत्येकी १-१ गडी बाद केला.