दोन पालकमंत्री बदलले , राज्याच्या मंत्रिमंडळात फेरबदल : मुख्यमंत्री
राज्याच्या मंत्रिमंडळात फेरबदल केल्याची माहिती मुख्यमंत्री देवेंद्र फडणवीस यांनी दिली. पुणे आणि जळगाव जिल्ह्याचे पालकमंत्री पद अनुक्रमे चंद्रकांत पाटील आणि गिरीश महाजन यांच्याकडे सोपविण्यात आले आहे. लवकरच मंत्रीमंडळ विस्तार करणार असल्याचेही फडणवीस यांनी यावेळी सांगितले. पुणे लोकसभा मतदारसंघातून निवडून आल्यामुळे गिरीश बापट हे खासदार बनले आहेत. त्यामुळे पुण्याच्या पालकमंत्रीपदाची धुरा सार्वजनिक बांधकाममंत्री चंद्रकांत पाटील यांच्याकडे सोपवण्यात आली आहे. पाटील यांच्याकडे असलेले जळगावचे पालकमंत्रीपद जलसंपदामंत्री गिरीश महाजनांना देण्यात आले आहे.
गिरीश बापट यांच्याकडे अन्न व औषध पुरवठा आणि संसदीय कामकाज मंत्री पदाची जबाबदारीही होती. अन्न व औषध पुरवठा मंत्रालयाचा कारभार आता पर्यटनमंत्री जयकुमार रावल सांभाळणार आहेत. संसदीय कामकाज मंत्रालयाचा कारभार शिक्षणमंत्री विनोद तावडे सांभाळणार आहेत. राज्यस्तरीय खरीपाच्या स्थितीचाही मुख्यमंत्र्यांनी या पत्रकार परिषदेत आढावा घेतला.