डॉ . पायल ताडवीच्या कुटुंबियांना सरकारकडून दहा लाख रुपयांची मदत, सखोल चौकशीची मागणी
नायर रुग्णालयातील वैद्यकीय अधिष्ठाता, वैद्यकीय सहाय्यक आणि कर्मचाऱ्यांची कसून चौकशी केल्यानंतर सोमवारी महाराष्ट्र आरोग्य विद्यापीठ आणि वैद्यकीय शिक्षण संशोधन संचानलनालयाने गठीत केलेल्या समित्यांकडून तडवी कुटुंबीयांकडे विचारणा करण्यात आली. डॉ. पायल हिला वर्षभर सहकारी डॉक्टरांकडून कशी वागणूक मिळत होती, तिला कोणत्या प्रकारचा त्रास दिला जात होता का, त्यासंदर्भातील तक्रार यापूर्वी तिने कधी केली, त्यावर कुटुंबीयांनी कोणती भूमिका घेतली, अशी विचारणा या चौकशीदरम्यान करण्यात आली. यासंदर्भातील अहवाल महाराष्ट्र मेडिकल कौन्सिल तसेच मेडिकल कौन्सिल ऑफ इंडियाकडे पाठवण्यात येणार आहे. पोलिस तपास आणि कायद्याच्या कक्षेत रॅंगिंग प्रकरणामुळे डॉ. पायल हिने स्वतःचे आयुष्य संपवल्याचे सिद्ध झाल्यास आरोपींचा वैद्यकीय परवाना कायमचा रद्द करण्यात येणार आहे. दरम्यान, पायलच्या कुटुंबीयांना सरकारकडून १० लाखांची आर्थिक मदत देण्यात आली.
नायर वैद्यकीय महाविद्यालयामध्ये आत्महत्या केलेल्या डॉ. पायल तडवी यांच्या मृत्यूमुळे कुटुंबाचे व समाजाचे मोठे नुकसान झाले आहे. सरकारने डॉ. तडवी यांच्या कुटुंबीयांना सोमवारी दहा लाख रुपयांची मदत देण्याचा निर्णय घेतला आहे. सरकारकडून दहा लाख रुपयांची मदत देण्यात आल्याचे वृत्त मटाने दिले आहे. आदिवासी समाजातून संघर्षमय परिस्थितीला तोंड देत वैद्यकीय क्षेत्रामध्ये करिअर करू पाहणाऱ्या डॉ. पायल या समाजातील अनेक मुलांचा आदर्श होत्या, त्यामुळे कुटुंबाला आर्थिक मदत, कायदेशीर सहाय्य मिळायला हवे, अशी मागणी अनेक सामाजिक संघटनांनी लावून धरली होती.
पायल हिचा मृत्यू नेमका कोणत्या कारणांमुळे झाला याचा तपास करण्यासाठी विविध प्रकारच्या समित्या गठीत करण्यात आल्या आहेत. पायलच्या कुटुंबीयांनी सकृतदर्शनी जे पुरावे पुढे येत आहेत ते लक्षात घेऊन आरोपींचे वैद्यकीय परवाने कायमचे निलंबित करावेत अशी मागणी केली. तपास योग्य प्रकारे व्हावा यासाठी सरकारसह इतर ज्या समित्या गठीत करण्यात आल्या आहेत त्यांनाही पूर्ण सहकार्य करत असल्याचेही त्यांनी स्पष्ट केले. पायलने आत्महत्या केली त्या ठिकाणचे सीसीटीव्ही फुटेज उपलब्ध झाल्यास त्या वेळी नेमके काय झाले, यासंदर्भात अधिक सुस्पष्टता येईल असे कुटुंबीयांचे म्हणणे आहे. मुख्यमंत्री देवेंद्र फडणवीस यांच्याशी झालेल्या चर्चेमध्ये या प्रकरणाचा निष्पक्षपातीपणे तपास करण्यात येईल असे आश्वासन देण्यात आले आहे, त्यानुसार तपास व्हावा अशी अपेक्षा व्यक्त केली.
डॉ. पायल हिच्या मृत्यूच्या कारणांचा तपास करण्यासाठी गठीत करण्यात आलेल्या समित्यांमध्ये विविध प्रकारच्या तज्ज्ञांचा सहभाग आहे. मात्र वैद्यकीय सामाजिक आणि शैक्षणिक क्षेत्रातील प्रश्नांचे भान असलेला, आदिवासी समाजातील आशाआकांक्षा अस्मिता समजून घेणाऱ्या तज्ज्ञांची समिती गठित झाल्यास हा तपास अधिक नेमकेपणाने होऊ शकेल अशी मागणीही या प्रकरणामध्ये सहभागी असलेल्या सामाजिक संघटनांनी केली आहे. वैद्यकीय शैक्षणिक संस्थांमध्ये होत असलेल्या अशा भेदभावांची व्यापक चौकशी करण्यासाठी संबंधित घटकांच्या प्रतिनिधींना सहभागी करुन चौकशी समितीचे गठन करण्यात यावे. या तक्रारींची योग्य दखल तातडीने घेतली जाण्यासाठी तक्रार निवारण यंत्रणेमध्ये प्रभावी सुधारणा करणे गरजेचे आहे. आदिवासी, दलित, अल्पसंख्यक यांना भविष्यात भेदभावाची वागणूक मिळू नये यासाठी वैद्यकीय विद्यार्थी, शिक्षक, वैद्यकीय व्यावसायिक यांच्यामध्ये प्रबोधन करण्याची मागणी आरोग्याच्या प्रश्नांवर काम करणाऱ्या जनआरोग्य संघटनेने केली आहे.