सीताराम येचुरी, डी. राजा, सुधाकर रेड्डी आणि प्रसिद्ध गीतकार जावेद अख्तर कन्हैया कुमारच्या प्रचारात
ज्येष्ठ कम्युनिस्ट नेते सीताराम येचुरी, डी. राजा, सुधाकर रेड्डी आणि प्रसिद्ध गीतकार जावेद अख्तर जेएनयू विद्यार्थी संघटनेचा माजी अध्यक्ष आणि भारतीय कम्युनिस्ट पक्षाचा (भाकप) उमेदवार कन्हैया कुमारयाच्यासाठी प्रचार करणार आहेत. कन्हैया कुमार बिहार राज्यातील बेगुसराय मतदारसंघातून निवडणूक लढवत आहे. इथे केंद्रीय मंत्री आणि फायरब्रँड भाजप नेते गिरीराज सिंग विरुद्ध कन्हैया कुमार अशी थेट लढत होत आहे.
भारतीय कम्युनिस्ट पक्षाने (सीपीआय) दिलेल्या माहितीनुसार, सीताराम येचुरी २३ एप्रिल या दिवशी बेगुसरायमध्ये प्रचारसभा घेणार आहेत. तर, सुधाकर रेड्डी हे २३ आणि २४ तारखेला कन्हैया कुमार याचा प्रचार करणार आहेत. सीपीआयचे राष्ट्रीय सचिव डी. राजा सोमवारी पाटण्यात दाखल होणार असून ते ५ दिवस कन्हैया कुमारसह पक्षाच्या उमेदवारांचा प्रचार करणार आहेत. गीतकार जावेद अख्तर हे २३ एप्रिल या दिवशी कन्हैया कुमार याचा प्रचार करणार आहेत. दरम्यान, अभिनेते प्रकाश राज शनिवारी बेगुसरायमध्ये दाखल होत आहेत.
बेगुसराय मतदारसंघात कन्हैया कुमार याला लोकांचा पाठिंबा वाढताना दिसत आहे. मी त्याच्यासोबत प्रवास करत असताना लोकांना कन्हैया कुमारकडून किती आशा आहेत हे लक्षात आले. बदल हा होणारच, असे प्रकाश राज यांनी म्हटले आहे. कन्हैया कुमारसाठी प्रचार करणारे प्रकाश राज हे दुसरे बॉलिवूड अभिनेते आहेत. या अगोदर अभिनेत्री स्वरा भास्करने कन्हैया कुमारसाठी प्रचार केला आहे.