‘त्याने’ विमानातही केले मार खाण्याचे धंदे….!!
दुबईहून दिल्लीला येणाऱ्या स्पाइस जेटच्या विमानात एका २५ वर्षीय महिलेची एका प्रवाशाने छेड काढली. आरोपी या महिलेच्या शेजारच्या सीटवर बसला होता. त्याने तिच्याशी गैरवर्तन केल्यानंतर तिच्यासह एकूण १७ महिला प्रवाशांनी त्याला चांगलाच चोप दिला. विमान लँड होताच आरोपीला पोलिसांच्या हवाली करण्यात आलं.
शारिख खान असं या आरोपीचं नाव आहे. पोलिसांनी दिलेल्या माहितीनुसार, त्याच्यावर छेडछाडीसंदर्भातला गुन्हा दाखल करण्यात आला आहे. तो दिल्लीचा राहणारा असून दुबईतल्या एका आयटी कंपनीत इंजिनीअर आहे.
हे विमान बुधवारी रात्री दुबईहून रवाना झालं. गुरुवारी पहाटे सुमारे ४.३० वाजता, सर्व प्रवासी झोपलेले असताना हा आरोपी गैरवर्तन करत असल्याची जाणीव या महिलेला झाली. तिने त्याचा प्रतिकार केला. अन्य महिला प्रवाशांनी तिला साथ दिली आणि त्याला मार मार मारला. विमान गुरुवारी पहाटे ५.१५ वाजता दिल्ली विमानतळावर उतरलं, तेव्हा त्याला पोलिसांच्या हवाली करण्यात आलं.