Sachin Tendulkar : शहिदांसाठी सचिनने जमवले १५ लाख
मास्टर ब्लास्टर सचिन तेंडुलकरने राजधानी दिल्लीमध्ये झालेल्या मॅरेथॉनमध्ये हजारो धावपटूंसह भाग घेतला. तसेच या स्पर्धेत पुश-अप्स चॅलेंज स्वीकारत सचिनने १५ लाख रुपये जमवून पुलवामा दहशतवादी हल्ल्यात शहीद झालेल्या जवानांच्या कुटुंबाला दिले आहेत.’आयडीबीआय फेडरल लाइफ इन्शुरन्स’ तर्फे मॅरेथॉनसह अन्य स्पर्धा जवाहरलाल नेहरू स्टेडियममध्ये आयोजित केल्या होत्या. या स्पर्धा सुरू होण्यापूर्वी सचिनने ‘कीपमुव्हिंग पुश-अप्स चॅलेंज’मध्ये १० पुश-अप्सचं आव्हान स्वीकारत अन्य धावपटूंना देखील हे चॅलेंजमध्ये स्वीकारण्याची विनंती केली होती. “या चॅलेंजमधून जी काही रक्कम मिळेल, ती शहिदांच्या कुटुंबाला मदत म्हणून दिली जाईल. मला खात्री आहे तुम्हाला भावनांची जाणीव आहे व आशा आहे की आपण या कार्यासाठी मला साथ द्याल.” असं सचिननं सांगितले. सचिन या कार्यक्रमाचा सदिच्छ दूत होता.