घरगुती वादातून पतीने डोक्यात बॅट मारून केली पत्नी व मुलाची हत्या, आरोपी अटकेत
राहुरी तालुक्यातील वांबोरी येथील मोरवाडी येथे घरगुती वादातून पतीने पत्नी व मुलाची हत्या केल्याची घटना रविवारी (२६ मे) घडली असून राहुरी पोलिसांनी आरोपीला तातडीने अटक केली. पत्नी संध्या भारत मोरे (वय २८) व मुलगा साई भारत मोरे (वय ६) अशी हत्या झालेल्या मायलेकाची नावे आहेत. तर, भारत ज्ञानदेव मोरे (वय ३०) असे आरोपीचे नाव असून त्याला अटक करण्यात आली आहे. वांबोरी येथे रविवारी (२६ मे) दुपारी भारत ज्ञानदेव मोरे याने घरगुती वादातून पत्नी संध्या व मुलगा साई यांच्या डोक्यात बॅट मारून मोरवाडी येथील राहत्या घरात त्यांची हत्या केली.
आरोपी भारत मोरे स्वतःच्या घरात दबा धरून बसला होता. आपल्या बायकोला व लहान मुलाला का मारले, याबाबत त्याने अद्याप पोलिसांना काही सांगितले नाही. तरी, ही हत्या घरगुती कारणांमुळे झाली असावी, असा संशय व्यक्त करून यामागे अन्य कोणते कारण आहे का, याचा शोध घेण्यात येत असल्याचे पोलिसांनी सांगितले. राहुरीचे पोलिस निरीक्षक हनुमंत गाडे, पोलिस उपनिरीक्षक सतीश शिरसाठ, पोलिस नाईक दिलीप तुपे यांनी घटनास्थळावरून आरोपी भारत मोरे याला ताब्यात घेतले. त्याच्यावर राहुरी पोलिस ठाण्यात गुन्हा दाखल करण्यात आला असून पोलिस तपास करीत आहेत.