पी. चिदंबरम यांना सीबीआय कोठडी नको त्यांना न्यायालयीन कोठडी देऊन तिहार तुरुंगात पाठवा : सीबीआय
माजी केंद्रीय अर्थमंत्री पी. चिदंबरम यांना सीबीआय कोठडी देऊ नका. त्यांना न्यायालयीन कोठडी देऊन तिहार तुरुंगात पाठवा, अशी मागणी सीबीआयने आज सर्वोच्च न्यायालयात केली. दरम्यान, सर्वोच्च न्यायालयाने चिदंबरम यांच्या सीबीआय कोठडीत ५ सप्टेंबरपर्यंत वाढ केली आहे. ५ सप्टेंबर रोजीच आता या प्रकरणावर न्यायालयात सुनावणी होणार आहे.
चिदंबरम यांनी सोमवारीच अंतरिम जामिनासाठी अर्ज केला होता. त्यावर राऊज अॅव्हेन्यू कोर्टात सुनावणी होणार आहे, असं सॉलिसिटर जनरल तुषार मेहता यांनी सर्वोच्च न्यायालयाच्या निदर्शनास आणून दिलं. त्यानंतर सीबीआयने आम्हाला चिदंबरम यांची कोठडी नको म्हणून सांगितलं. त्यांना न्यायालयीन कोठडी देण्याची मागणीही सीबीआयने केली. मात्र सीबीआयचा हा युक्तिवाद तात्काळ ऐकण्यास कोर्टाने नकार देत चिदंबरम यांच्या सीबीआय कोठडीत ५ सप्टेंबरपर्यंत वाढ केली. चिदंबरम यांना २१ ऑगस्ट रोजी त्यांच्या निवासस्थानावरुन सीबीआयने नाट्यमयरित्या अटक केली होती. सीबीआयबरोबरच ईडी देखील या प्रकरणाची चौकशी करीत आहे.