सोने खरेदी फसवणूक : ‘तुझ्यात जीव रंगला’ फेम अभिनेते मिलिंद दास्ताने व त्याच्या पत्नीला पोलीस कोठडी
औंध येथील ‘पीएनजी ब्रदर्स’ या नामांकित सराफी पेढीमधून सोने खरेदी केल्यानंतर बिलाची रक्कम देण्यास टाळाटाळ करत २५ लाख रुपयांची फसवणूक करणाऱ्या ‘तुझ्यात जीव रंगला’ फेम अभिनेता मिलिंद दास्ताने व त्याच्या पत्नीला चतुःश्रृंगी पोलिसांनी मंगळवारी अटक केली. त्यांना कोर्टाने २१ जूनपर्यंत पोलीस कोठडी सुनावली.
अभिनेता मिलिंद गणेश दास्ताने, त्याची पत्नी सायली मिलिंद दास्ताने उर्फ सायली बालाजी पिसे (दोघेही रा. त्रिमूर्ती सोसायटी, तळजाई पठार, धनकवडी) यांना अटक करण्यात आली आहे. याप्रकरणी “पीएनजी ब्रदर्स’च्या अक्षय श्रीकृष्ण गाडगीळ (वय ३४ रा. कर्वेनगर) यांनी फिर्याद दिली होती. त्यावरून दास्ताने दाम्पत्यविरुद्ध फसवणुकीचा गुन्हा दाखल झाला होता.
दास्ताने यांनी औंध येथील आयटीआय रस्त्यावरील “पीएनजी ब्रदर्स’ सराफी पेढीमधील कर्मचाऱ्याशी असलेल्या ओळखीचा गैरफायदा घेऊन तेथून वारंवार सोने-चांदीचे दागिने, बिस्कीटे व हिरे खरेदी केले होते. खरेदी केलेल्या दागिन्यांची काही प्रमाणात रक्कम दिली होती. मात्र उर्वरीत रक्कम व त्यावरील व्याज देण्यास दास्ताने वेगवेगळी कारणे सांगून टाळाटाळ करत होते. वारंवार मागणी करुनही दास्ताने बिलाची रक्कम देण्यास टाळाटाळ करत असल्याने अक्षय गाडगीळ यांनी चतुःश्रृंगी पोलीस ठाण्यात फिर्याद दिली होती.